Bernd Leno aitwa timu ya taifa ya Ujerumani

Golikipa wa Arsenal, Bernd Leno ameitwa na timu ya taifa ya Ujerumani ili kuichezea katika kombe la  UEFA Nations League.

Bernd Leno aitwa timu ya taifa ya Ujerumani

Timu ya Taifa ya Ujerumani itacheza na timu za taifa za Ufaransa na Uholanzi katika michuano hiyo.

Leno ameitwa kuchukua nafasi ya Kevin Trapp, ambaye atakosa michezo yote miwili kutokana na kuwa na maumivi ya misuli.

Leno ameishaichezea Arsenal katika michezo mitano tangu ajiunge na timu hiyo akitokea Bayer Leverkusen katika dirisha lililopita la usajili.

Kwa sasa mchezaji huyo anacheza mechi zote za Arsenal baada ya kuumia kwa kipa namba moja wa Arsenal Petr Cech ambaye anatazamiwa kurudi ndani ya wiki mbili zijazo.

Kuitwa kwa Bernd Leno ni jambo zuri kwani kutasaidia kuongeza uwezo kwa kujiamini kwa mchezaji huyo.

#COYG

Rasmi-Arsenal yatangaza kuingia mkataba Adidas

Arsenal leo imedhibitisha kuingia mkataba na kampuni ya Adidas kama mtengenezaji mkuu wa jezi za Arsenal kuanzia msimu ujao.

Rasmi-Arsenal yatangaza kuingia mkataba Adidas

Arsenal ilitangaza habari hizo kupitia ukurasa wake rasmi wa twitter na bado hakuna taarifa za kina kuhusu mkataba huo ingawa taarifa tulizonazo ni kwamba mkataba huo ni mnono zaidi kuliko ule wa Puma uliosainiwa mwaka 2013 na unaisha tarehe 30 ya mwezi wa sita mwakani.


Mashabiki wengi wa Arsenal wameonesha kufurahishwa na taarifa hizo kwani kwa muda mrefu sasa puma wamekuwa wakitengeneza jezi ambazo mashabiki wengi wa Arsenal hawakuzipenda.

#COYG

Arsenal yaipiga mkono Fulham

Arsenal jana ilipata ushini mwingine baada ya kuifunga timu ya Fulham kwa jumla ya magoli 5-1 na rasmi kuingia ndani ya nne bora.

Arsenal yaipiga mkono Fulham

Kulikuwa na mambo mengi ya kufurahisha katika safari hiyo ya Craven Cottage, cha kwanza kilikuwa ni jinsi Unai Emery alivyoibadilisha timu na kuwaacha baadhi ya wachezaji muhimu nje.

Mesut Ôzil alikosa mchezo huo kutokana na kuwa na maumivu ya mgongo, Aubamayang na Aaron Ramsey walianzia katika benchi la wachezaji wa timu ya akiba.

Arsenal walikianza kipindi cha kwanza taratibu,na ilipata goli la kwanza kupitia kwa Alexandre Lacazette ambaye alipata mpira ndani ya eneo la hatari na kufanikiwa kugeuka na kufunga.

Ikiwa imebaki dakika moja kwenda mapumziko beki wa Arsenal, Nacho Monreal alifanya kosa na kupoteza mpira ambao ulimkuta Schurlle aliyewafungia Fulham goli la kusawazisha na kufanya timu hizo kwenda mapumziko 1-1.

Kipindi cha pili Arsenal walibadilika na kucheza soka la hali ya juu mno, Lacazette alifunga goli la pili kwa shuti la mbali ambalo golikipa wa Fulham alishindwa kulizuia.

Mambo yalibadilika zaidi baada ya Aubamayang na Ramsey kuingia, sekunde chache baada ya kuingia Ramsey alianzisha mpira kutokea upande wa beki wa kulia wa Arsenal na kuumalizia kwa bonge la goli, goli la Ramsey ni moja ya magoli bora kabisa kuwahi kufungwa na Arsenal.

Auba alifunga magoli mengine mawili na kuifanya siku ya jana kuwa moja ya siku bora kabisa kwa mashabiki wa Arsenal.

Hadi mwisho wa mchezo huo Arseanal 5-1 Fulham.

Baada ya mchezo huo  kutakuwa na mapumziko ya wiki mbili ili kupisha michezo ya kimataifa na mchezo unaofuatia wa Arsenal ni dhidi ya Leicester City utakaofanyika jumatatu ya tarehe 22 ya mwezi huu.

 

Arsenal yaifunga Qarabag 3-0

Emile Smith Rowe, Matteo Guendouzi na Sokratis walifunga kwa mara ya kwanza dhidi ya timu ya Qarabag na kuipa Arsenal ushindi wa goli 3-0.

Arsenal yaifunga Qarabag 3-0

Wachezaji wa Arsenal wakishangilia goli la Soktratis dhidi ya Qarabaq hapo jana.

Kocha wa Arsenal, Unai Emery alipanga kikosi kizito katika mchezo huo ambapo wachezaji wengi wa kikosi cha kwanza walianza ama kukaa katika benchi la wachezaji wa akiba.

Alikuwa ni beki Mgiriki Sotratis aliyekuwa wa kwanza kuipatia Arsenal goli la kwanza baada ya kumalizia mpira wa kichwa uliopigwa na Nacho Monreal baada kufuatia kona iliyopigwa na Mohamed Elneny.

Sokratis anakuwa mchezaji wa kwanza ambaye hajafundishwa na Arsene Wenger kuifungia Arsenal goli katika mechi ya ushindani toka mwezi wa tano mwaka 1996.

Baada ya goli hilo Qarabaq waliamka na kuanza kishambulia Arsenal kwa nguvu, lakini umakini wa mlinda mlango wa Arsenal, Bern Leno ulisaidia kuwafanya Arsenal waende mapumziko wakiongoza kwa goli hilo moja.

Kipindi cha pili kilianza kwa Arsenal kufanya mabadiliko, ambapo Nahodha wa jana Nacho Monreal alitolewa na Nafasi yake kuchukuliwa na kiungo Lucas Torreira.

Kuingia kwa Torreira kulibadilisha hali ya mchezo na Arsenal ilianza kutawala mchezo huo hasa sehemu ya kiungo.

Arsenal walifanikiwa kupata goli la pili baada ya Alex Iwobi kuwahadaa wachezaji wa Qarabaq na kumpasia Emile Smith Rowe ambaye bila kukosea aliukwamisha wavuni.

Goli hilo lilikuwa ni goli la kwanza kwa kinda huyo kuifungia timu ya wakubwa ya Arsenal na linamfanya awe mchezaji wa kwanza aliyezaliwa baada ya mwaka 2000 kuifungia Arsenal goli katika mechi ya ushindani.

Alikuwa ni kinda mwingine Matteo Guendouzi aliyeifungia goli la tatu baada ya kupokea mpira kutoka kwa Alexandre Lacazette na kupiga shuti lililoenda moja kwa moja wavuni.

Hilo lilikuwa goli la kwanza la Guendouzi katika jezi za Arsenal na pia ni goli lake la kwanza tangu aanze kucheza soka la ushindani.

Hadi mwisho wa mchezo Arsenal 3-0 Qarabag.

Ushindi huo unaiweka Arsenal kileleni mwa kundi lake na unaifanya timu iwe katia nafasi nzuri ya kushika nafasi ya kwanza katika kundi.

Arsenal itacheza tena jumapili mchana dhidi ya Fulham katika ligi kuu ya Uingeleza kabla ya kupumzika kwa wiki pili kupisha mechi za kimataifa.

Magoli na sehemu muhimu za mchezo wa jana unaweza kuangalia katika video iliyopo hapo chini. #COYG

Unai Emery abeba jeshi zima kuelekea Baku

Arsenal wapo katika mji wa Baku nchini Azerbaijan, wakijiandaa kupambana na Qarabag ya nchini humo, kuelekea katika mchezo wa makundi wa kugombea kombe la Ueropa League.

Unai Emery abeba jeshi zima kuelekea Baku

Arsenal wakifanya mazoezi mjini baku

Tumezoea kuona timu kubwa zikipumzisha wachezaji wake muhimu katika mechi kama hizi lakini naona ya kwamba Emery yeye ameamua kuweka msisitizo na kupekeka kikosi chote kwa kwanza.

Katika picha zilizowekwa mtandaoni na Ukurasa rasmi wa Arsenal, zilionesha wachezaji wote wa kikosi cha kwanza ambao wapo fiti wakipanda ndege kuelekea nchini Azerbaijan.

Ukiondoa wachezaji walio majeruhi kama Petr Cech na Laurent Koscienly, Emery aliawaacha Uingeleza wachezaji watatu tu wa kikosi cha kwana.

Wachezaji walioachwa ni Aaron Ramsey ambaye anategemewa kupata mtoto siku si nyingi, Pierre Emerick Aubamayang ambaye hadi juzi alikuwa anaumwa homa na Henriki Mkhitaryan ambaye hakuweza kusafiri kutokana na uhusiano wa kidipromasia kati ya Armenia na Azerbaijan kuwa na matatizo.

Kwa hali inavyoonesha inawezekana leo tutaona Arsenal ikipanga kikosi chake cha kwanza ili kujihakikishia ushindi katika mchezo huo.

Hapa chini ni video ya wachezaji wa Arsenal wakifanya mazoezi mjini Baku, usikose kuangalia goli la Özil.

 

Kombe la Carabao-Arsenal yapangiwa na Blackpool raundi ya nne

Arsenal imepangiwa kucheza na timu ya Blackpool katika mchezo wa raundi ya nne ya kuwania kombe la Carabao.Mchezo huo utafanyika katika uwanja wa Emirates kati ya tarehe 30 na 31 ya mwezi wa 10.

Kombe la Carabao-Arsenal yapangiwa na Blackpool raundi ya nne

Katika michuano hiyo kuna timu 9 za ligi kuu ya Uingeleza, timu 4 za ligi daraja la kwanza , lakini Arsenal wamebahatika kupewa moja ya timu mbili za ligi daraja la pili zilizobakia.

Katika mchezo wa raundi ya tatu ya kombe hilo dhidi ya Brentford, kocha wa Arsenal, Unai Emery alipanga kikosi kamili kikiwa na wachezaji wengi wakongwe na wazoefu ukiondoa kinda pekee Emile Smith Rowe.

Litakuwa ni jambo la kusubiri kuona kama Unai atapanga tena kikosi kamili dhidi ya timu hiyo ya daraja la pili.

Hiyo itakuwa ni mechi ya nne katika siku 10 au 11, huku Arsenal wakicheza na Liverpool siku chache baada ya mchezo huo (Liverpool watakuwa wamepumzika wiki nzima kutokana na kutolewa mapema katika kombe hilo).

Ratiba ya mechi zingine za kombe la Carabao

Manchester City vs. Fulham
Bournemouth vs. Norwich
Leicester vs. Everton/Southampton
West Ham vs. Tottenham
Middlesbrough vs. Crystal Palace
Chelsea vs. Derby County
Burton Albion vs. Nottingham Forest

Arsenal yashinda tena-Arsenal 2-0 Watford

Mambo yameendelea kunoga pale Emirates baada ya Arsenal kifanikiwa kushinda tena baada ya kuifunga timu sumbufu ya Watford kwa jumla ya magoli mawili bila majibu.

Ozil na Iwobi wakishangilia goli la Arsenal dhidi ya Watford

Ozil na Iwobi wakishangilia goli la Arsenal dhidi ya Watford

Kama nilivyotegemea, mchezo ulikuwa wazi na wa kutumia nguvu nyingi ambapo timu zote zilishambuliana kwa zamu.

Arsenal walifanikiwa kupata goli la kwanza baada ya mchezaji wa Watford kujifunga katika harakati za kuokoa krosi nzuri iliyopigwa na Alex Iwobi.

Fundi Mesut Ôzil aliifungia Arsenal goli la pili dakika mbili baadaye baada ya kumalizia krosi safi iliyopigwa kutoka upande wa kulia wa uwanja na Alexadre Lacazette.

Katika mchezo huo kocha mkuu wa Arsenal, Unai Emery alilazimika kufanya mabadiliko mwishoni mwa kipindi cha kwanza baada ya golikipa Petr Cech kuumia misuli na nafasi yake kuchukulia na Bernd Leno.

kikosi cha Arsenal

Leo Arsenal ilianza na kikosi kifuatacho: Cech, Bellerin, Holding, Mustafi, Monreal, Torreira, Xhaka, Ozil, Ramsey, Aubameyang, Lacazette

Wachezaji wa akiba: Leno, Lichtsteiner, Kolasinac, Guendouzi, Mkhitaryan, Iwobi, Welbeck

Katika mchezo huo Watford walionekana kuwa hatari zaidi, huku Arsenal wakionesha kukosa kuelewana hasa katika safu ya ushambuliaji, mabadiliko ya kuwatoa Aaron Ramsey na Aubamayang na kuwaingiza Iwobi na Danny Welbeck yalionekana kufanya kazi kwani wachezaji hao walichangia sana katika upatikanaji wa magoli yote mawili.

Huu unakuwa ushindi wa saba katika michezo saba iliyochezwa mwezi wa tisa na Arsenal inapaa hadi nafasi ya tano katika msimamo wa ligi.

Ni ushindi mzuri na ni wakati muafaka kwa mashabiki wa Arsenal kuanza kuzoea kushinda mara kwa mara.

Hapo chini kuna video yenye vipande muhimu vya mchezo na magoli ya Arsenal

#COYG

Danny Welbeck na Aaron Ramsey bado wapo kwenye mazungumzo na Arsenal

Kocha mkuu wa Arsenal, Unai Emery amesema ya kwamba wachezaji  Welbeck na Aaron Ramsey wapo katika mazungumzo na Arsenal kuhusu kusaini mikataba mipya.

Danny Welbeck na Aaron Ramsey bado wapo kwenye mazungumzo na Arsenal

Kauli hii imekuja baada ya juzi jumatano magazeti ya Mirror and na Daily Mail kuandika ya kwamba Aaron Ramsey yupo mbioni kuihama timu hiyo baada ya mazungumzo baina ya pande hizo mbili kuvunjika.

Gazeti la The mirror liliendelea kuhabalisha ya kwamba Arsenal iliamua kuachana na mpango wa kumpa mkataba mchezaji huyo licha ya kwamba ilikataa kumuuza kwa dau la paundi  milioni 50 katika dirisha la usajili lililopita.

Taarifa hizo zinakinzana na alichosema Emery katika mkutano na waandishi wa habari, akisisitiza ya kwamba wachezaji wote wawili wapo katika mazungumzo na timu.

“Najua ya kwamba wapo katika mwaka wa mwisho wa mikataba yao na timu na wanaendelea na mazungumzo kuhusu mikataba mipya,” Alisema alipokuwa akijibu swali kuhusu wachezaji hao.

“Kwangu mimi msisitizo ni katika mechi tunazocheza na pia katika mazoezi.Kujituma na kiwango cha mchezo kutoka kwa wachezaji ni cha hali ya juu, suala ya Aaron na Danny Welbeck ni kitu kati ya timu na wachezaji.”

Kwa maneno hayo inaonesha ya kwamba Eery hausiki sana katika majadiliano hayo, ila litakuwa ni jambo la ajabu kama waandishi wa habari wa mirror kama John Cross wanajua ya kwamba mazungumzo kati ya Ramsey na Arsenal yamefunjika kabla ya kocha mkuu.

Pia ikumbukwe ya kwamba ni hao hao Mirror na John Cross walioandika ya kwamba Mesut Özil alikuwa akiwaambia wachezaji wenzake ya kwamba anaenda kujiunga na Manchester United.

Pia alikuwa ni John Cross na Mirror walioandika ya kwamba Mikel Arteta na Jack Wilshere walikuwa wamekubaliana na Arsenal na wangesaini mikataba ndani ya wiki moja.

Cha msingi hapa ni kusubiri na kuona nini kitatokea kwani hatujui ni nini kinaendelea nyuma ya pazia. Je unataka Ramsey auzwe au apewe mkataba mpya? tupia maoni yako hapo chini.

 

Lacazette atoa siri ya kuifunga Everton

Mshambuliaji wa Arsenal, Alexandre Lacazette ameelezea siri ya Arsenal kubadilika katika kipindi cha pili na kufanikiwa kuifunga timu ya Everton kwa jumla ya magoli 2-0.
Lacazette atoa siri ya kuifunga Everton
Siri kubwa ya kupata ushindi katika kipindi cha pili ni kwamba ”kocha aliwaambia baadhi ya wachezaji wapande na wacheze kwa kasi zaidi”

Akiongea na kituo cha habari cha RMC, mshambuliaji huyo wa kimataifa wa Ufaransa na Arsenal ,Alexandre Lacazette, alisema ya kwamba kocha mkuu wa Arsenal, Unai Emery ndiye aliyekuwa chachu kubwa ya ushindi huo baada ya kutumia muda wa mapumziko kuwaelezea ni nini walichotakiwa kufanya kiufundi ili kushinda mchezo huo.

“Tuliongea sana, kocha aliwaambia baadhi ya wachezaji kupanda kusaidia mashambulizi na kucheza kwa kasi zaidi, kucheza kiufundi zaidi, kwa sababu katika kipindi cha kwanza tulifanya makosa mengi.Tukicheza kama tulivoycheza kipindi cha pili ni vigumu kutufunga. Kuchoka kwa wapinzani pia kulichangia” . alisema mchezaji huyo.

Arsenal walipata ushindi wao wa nne kwenye ligi na kushika nafasi ya sita kwenye msimamo wa ligi kuu, leo hii wanatua uwanjani kupambana na timu ya Brentford kwenye kombe la Carabao.

Arsenal yapata ushindi wa tano chini ya Unai Emery

Baada ya kuanza ligi kwa kusua sua na kupoteza michezo yake miwili ya mwanzo, Arsenal chini ya kocha Unai Emery inaonekana ya kwamba imeanza kubadika na imefanikiwa kushinda michezo yake mitano, minne ikiwa ni ya ligi kuu ya Uingeleza na mmoja ni kwenye kombe la Europa League.

Arsenal yapata ushindi wa tano chini ya Unai Emery

Katika mchezo wa jana Arsenal iliishinda timu ya Everton kwa jumla ya magoli 2-0, magoli yaliyofungwa na washambuliaji wake hatari , Pierre Emerick Aubamayang na Alexandre Lacazette.

Kama kawaida katika mechi za hivi karibuni Arsenal walianza mchezo huo taratibu sana kiasi cha kwamba kama washambuliaji wa Everton wangekuwa makini wangeweza kupata magoli si chini ya mawili katika kipindi cha kwanza.

Habari mbaya zaidi ilikuwa ni kuumia kwa beki wa kati wa Arsenal, Sokratis na nafasi yake kuchukuliwa na Rob Holding ambaye alicheza vizuri.

Mpaka kipindi cha kwanza kinaisha mchezo huo ulikuwa 0-0.

Kipindi cha pili Arsenal ilianza bila kufanya mabadiliko na wakati Emery akijiandaa kufanya mabadiliko Lacazette alifunga bonge la goli baada ya kupiga mpira kiufundi na kumfanya mlinda mlando wa Everton, Jordan Pickford ausindikize mpira kwa macho wakati ukiingia wavuni.

Wahenga walisema magoli hubadili taswira ya mchezo na hicho ndicho kilichotokea kwani baada ya kuingia kwa goli hilo Arsenal walibadilika na kuanza kucheza soka la uhakika.

Dakika chache baadaye Arsenal ilipata goli la pili kupitia kwa Aubamayang baada ya kupokea pasi kutoka kwa Aaron Ramsey.

Goli hilo limeleta mjadala mkubwa kwenye mitandao ya kijamii baada ya marudio kuonesha ya kwamba mchezaji huyo alikuwa amaotea.

Badda ya magoli hayo timu zote zilifanya mabadiliko lakini mabadiliko hayo hayakuweza kubadili matokeo kwani hadi mwisho wa mchezo Arsenal 2-0 Everton.

Jumatano usiku Arsenal itacheza na Brentford katika mchezo wa kugombea kombe la Carabao.

 

Arsenal yatangaza uongozi mpya

Baada ya leo kutangaza ya kwamba kiongozi wake mkuu Ivan Gazidis atatimkia AC Milan, Bodi ya Arsenal imetangaza uongozi mpya.

uongozi mpya wa Arsenal Vinai Venkatesham na Raul Sanllehi

uongozi mpya wa Arsenal Vinai Venkatesham (kulia) na Raul Sanllehi (kushoto)

Katika uongozi mpya Raul Sanllehi anakuwa mkurugenzi wa soka na Vinai Venkatesham anakuwa mkurugenzi wa utawala.

Mabadiliko hayo yalitangazwa na makamu mwenyekiti wa Arsenal, Josh Kroenke, ambaye pia ni mtoto wa mmiliki wa Arsenal Stan Kroenke.

Katika mabadiliko hayo,Arsenal haitateua mkurugenzi mtendaji mpya bali itagawanya majukumu yake kwa watu wawili ambao tayari walikuwa ni wafanyakazi wa Arsenal.

Katika Uongozi mpya mhispania Raul Sanllehi amebadilishiwa cheo kutoka kuwa mkurugenzi wa uhusiano wa soka na kuwa mkurugenzi wa soka, hali inayomfanya yeye kuwa ndiye mwenye uamuzi wa mwisho katika kila kitu kinachohusu soka katika timu ya Arsenal kwa maneno mengine yeye ndiye atakayekuwa bosi wa Unai Emery na pia ndiye atakayesimamia usajili.

Vinai Venkatesham, ambaye cheo chake kipya kitakuwa ni mkurugenzi wa utawala, amekuwa ni mtumishi wa Arsenal tangu mwaka 2010 . Baada ya kuwa kwenye kamati ya maandalizi ya michezo ya Olimpiki iliyofanyika London mwaka 2012 ameshika nafasi mbali mbali za utawala katika timu ya Arsenal.

Inasemekana yeye ndiye kichwa kilichofanikisha mpango wa Arsenal kuachana na Puma na kuingia mkataba mpya na Adidas (kuanzia mwakani), kila siku umuhimu wake umekuwa ni mkubwa ndani ya Arsenal.

Wakata Raul ataongoza upande wa soka, Venkatesham yeye ataongoza Arsenal upande wa biashara. Baada ya kuondoka wa Wenger na sasa Gazidis inaonekana ya kwamba Arsenal kwa sasa wana mfumo wa utawala unaoeleweka kwani kila mtu anajua majukumu yake na hicho kinaweza kuwa kitu chenye manufaa kwa timu.

Uteuzi huo wa viongozi wapya wa Arsenal ni wa kudumu kwani Arsenal wameamua kuachana na cheo cha mkurugenzi mtendaji ambapo mtu mmoja alikuwa anafanya kazi zote na sasa wamegawanya madaraka kwa watu wawili.

Pia uteuzi huo unamaliza wasiwasi wa wapenda Arsenal wengi ambao walikuwa hawataki kuona Stan Kroenke anamteua mtoto wake Josh Kroenke kama mkurungenzi mkuu wa Arsenal kwani hana uzoefu katika mambo ya uendeshaji wa timu ya soka.

Lakini sasa Raul ambaye ana uzoefu mkubwa wa kuongoza timu ya soka (kwa wale waliokuwa hawajui alikuwa na cheo kama hicho katika timu ya Barcelona ya Hispania) na pia Venkatesham ana uzoefu mkubwa linapokuja suala la mikataba ya kibiashara, hivyo ni matumaini yetu ya kwamba Arsenal ipo katika mikono salama.