Aaron Ramsey akaribia kusaini mkataba mpya Arsenal

Mwandishi wa gazeti la Telegraph,Jeremy Wilson anaandika ya kwamba mchezaji wa Arsenal, Aaron Ramsey anakaribia kusaini mkataba mpya na Arsenal.

Aaron Ramsey akaribia kusaini mkataba mpya Arsenal

Kuna taarifa ya kwamba Ramsey pamoja na Granit Xhaka, wapo katika mipango ya kocha wa ArsenalUnai Emery ambapo ana mpango wa kujenga kiungo cha watu watatu ambao wawili ni wachezaji hao.

Tatizo ambalo linasababisha Ramsey ni mshahara, ambapo mwaka 2014 alisaini mkataba wa miaka mitano kwa mshahara wa paundi laki moja kwa wiki na hakuwahi kuongezewa mshahara.

Kwa sasa Ramsey ambaye ni mmoja ya wachezaji muhimu wa Arsenal anataka nyongeza ya msahara na kuna tetesi ya kwamba Arsenal wapo tayari kumpatia mshahara hadi paundi laki mbili kwa wiki kiasi ambacho pia hupokea Henrikh Mkhitaryan na Pierre-Emerick Aubameyang.

Pia kuna tetesi ya kwamba Aaron Ramsey ambaye amekaa Arsenal kwa miaka 10 anaweza kutangazwa kuwa nahodha mpya wa Arsenal baada ya nahodha wa sasa Per Metersacker kustaafu na Laurent Koscienly kuwa majeruhi hadi mwezi wa 12 mwaka huu.

Mchezaji wa tatu ambaye anategemewa kukamilisha safu ya kiungo ni Lucas Torreira ambaye vyombo vingi vya habari kutoka Italia vinadai ya kwamba usajili wake umeshakamilika na muda wowote anaweza kufanyiwa vipimo na kutangazwa kuwa mchezaji wa Arsenal

Aaron Ramsey ndiye aliyefunga goli la msimu na pia alichaguliwa kuwa mchezaji bora wa msimu katika msimu uliopita.

Mesut Özil kuomba jezi namba 10 Arsenal

Kiungo wa Arsenal,Mesut Özil anatazamiwa kuwasilisha ombi rasmi la kuomba jezi namba 10 ili aweze kuitumia katika msimu ujao.

Mesut Özil kuomba jezi namba 10 Arsenal

Jezi namba 10 ilikuwa ikivaliwa na mchezaji wa zamani wa Arsenal,Jack Wilshere ambaye ametangaza kuhama Arsenal siku chache zilizopita.Wilshere aliichukua namba hiyo baada ya Robin Van Persie kuhamia Machester United.

Özil aliwahi kuwasilisha ombi la kubadilishiwa namba mwaka juzi wakati Jack alipoenda bournemouth, lakini hakuweza kutimiza nia yake hiyo kwani ombi lake lilichelewa.

Sababu kubwa ya Mesut Özil kuitaka namba hiyo ni kwamba katika kampuni yake na matangazo ya kibiashara nembo yake ni M10, kitu ambacho hakiendani na namba anayovaa sasa ambayo ni 11.

Pia ikumbukwe ya kwamba Mesut alichukua namba 10 katika timu ya taifa ya Ujerumani baada ya Lukas Podolski kustaafu, na pia alivaa jezi namba 10 alipokuwa akiichezea Real Madrid ya Hispania.

 

 

JACK WILSHERE –Kipaji cha hali ya juu kilichoshindwa kufikia kilele cha mafanikio

‘Hatacheza katika timu ya wachezaji kwa muda mrefu’. Hayo yalikuwa ni maneno ya Arsene Wenger,alipokuwa akimuongelea Jack Wilshere, bado akiwa ni mwanafunzi katika shule ya  soka ya Arsenal, baada ya kuonesha kiwango cha hali ya juu katika mchezo dhidi ya West Ham zaidi ya miaka 10 iliyopita.

JACK WILSHERE –Kipaji cha hali ya juu kilichoshindwa kufikia kilele cha mafanikio

Goli kali alilofunga Wilshere litabaki kuwa moja ya magoli bora yaliyowahi kufungwa na mchezaji wa timu za vijana za Arsenal, na kwa wakati huo ilikuwa ni wazi ya kwamba angekuja kuwa nyota mkubwa kwa miaka mingi ambaye ingefuatia.

Kijana huyo mdogo alikuwa ameiweka dunia mguuni pake na hakuna ambaye alikuwa na shaka ya kwamba kijana huyo kutoka Hale End angekuja kuwa mchezaji wa kiwango cha dunia.Bahati mbaya majeraha ya mara kwa mara yalisababisha kudumaa kwa kipaji cha Wilshere,ambaye juzi baada ya kuichezea Arsenal michezo 197,ametangaza ataondoka baada ya kumalizika kwa mkataba wake mwishoni mwa mwezi huu.

Kila shabiki wa soka anajua kwa nini Wilshere hakufikia katika kilele cha mafanikio kama wengi tulivyokuwa na matumaini, lakini hilo halituzuii kukumbuka ya kwamba alikuwa ni mchezaji mwenye kipaji cha hali ya juu ambaye jina lake lilikuwa likiimbwa na mashabiki wengi wa Arsenal kila alipokuwa akigusa mpira.

Jack alianza maisha ya soka katika shule ya soka ya Luton Town,baadaye mwaka 2001 alijiunga na Arsenal ambapo alicheza katika timu za watoto.

Katika mwisho wa msimu wa mwaka 2006/07 Wilshere alipata nafasi ya kucheza katika timu ya watoto wenye chini ya umri wa miaka 18, na msimu uliofuatia alifanikiwa kuwa nyota wa timu hiyo ya watoto.Akiwa na uwezo wa kupiga pasi za haraka na uwezo mkubwa wa kukimbia huku akiwa na mpira,alikuwa akionekana ni bora hata kuliko wachezaji waliokuwa na umri mkubwa kumzidi.

Baada ya kung’ara katika timu hiyo ya watoto Wilshere alipandishwa katika kikosi cha wachezaji wa akiba na mchezo wake wa kwanza ulikuwa dhidi ya Reading ambapo alifunga katika mchezo huo na baadaye kucheza kwa kiwango cha hali ya juu katika mchezo uliofuata dhidi ya West Ham.

Mchezo mwingine ambao Jack Wilshere alicheza kwa kiwango cha hali ya juu ulikuwa dhidi ya Derby Country baada ya kupiga pasi ya maana na kumtengenezea goli mchezaji mwenzake  Rhys Murphy.

Aliendelea kucheza vizuri katika timu za vijana na akiba, Wilshere alikuwa ni mmoja ya wachezaji walioshinda kombe la FA kwa timu za vijana mwaka 2009( akiwa na Frimpong na Francis Coquelin), kipindi hicho tayari alikuwa ameshaanza kuichezea timu ya wakubwa.

Baadaye Wilshere alifanikiwa kuwa katika kikosi cha kwanza cha Arsenal na alicheza kwa mafanikio makubwa, tukio la kukumbukwa ni pale alipoweza kuwafunika Xavi na Iniesta mwaka akiwa na miaka 19 tu.Pia aliweza kufunga moja ya magoli bora kabisa niliyowahi kushuudia baada ya kumalizia gonga 22 za wachezaji wa Arsenal na kisha kuwafunga Norwich.

Anaondoka Arsenal akiwa ameshinda makombe mawili ya FA na timu ya wakubwa.

Ni jambo la kusikitisha ya kwama Jack Wilshere hataweza kucheza hadi anastaafu akiwa katika timu ya Arsenal, lakini naamini bado ana uwezo wa kwenda sehemu nyingine na kwenda kufufua makali yake.

Bila kujali kama anaichezea timu ya watoto , ya wachezaji wa akiba ama kikosi cha kwanza,Wilshere mara zote alikuwa akiichezea Arsenal kwa mapenzi makubwa, hali hiyo ilimfanya kupendwa na mashabiki wengi wa Arsenal.

Mimi binafsi naona kuondoka kwake ni kitu sahihi kufanya ili kujaribu kuokoa kipaji chake kwani kwa sasa anahitaji kucheza mara kwa mara kitu ambacho asingeweza kufanya akiwa na Arsenal.

Ni matumaini yangu ya kwamba muda si mrefu atarudi kwenye kiwango chake na tutamuona tena akiwa na timu ya taifa ya Uingeleza.

Asante na kwa heri Jack Wilshere.

Hapa chini nimekuwekea goli la Wilshere alilowafunga West Ham.

 

Jack Wilshere atangaza kuondoka Arsenal

Kiungo wa Arsenal Jack Wilshere, ametangaza rasmi kuondoka kwenye timu hiyo mara tu mkataba wake utakapofikia ukingoni mwishoni mwa mwezi huu.

Jack Wilshere atangaza kuondoka Arsenal

Jack Wilshere atangaza kuondoka Arsenal

Mchezaji juyo mwenye umri wa miaka 26 amekuwa na kikosi cha Arsenal kwa miaka 17 na kuna kipindi alichukulia kuwa ni mmoja ya wachezaji wenye vipaji bora kabisa duniani, lakini majeraha ya mara kwa mara yamemfanya ashindwe kufikia matarajio ya wengi.

Katika walaka wake aliouandika kwenye mtandao wa instagram, mchezaji huyo alitangaza uamuzi huo huku akiweka wazi ya kwamba ameamua kufanya hivyo baada ya kukutana na kocha mkuu wa Arsenal , Unay Emery ambaye alishindwa kumhakikishia nafasi ya kucheza katika kikosi cha kwanza.

Jack Wilshere aliendelea kuandika ya kwamba alikubali kusaini mkataba wa malipo kidogo kuliko aliyoyokuwa anapata awali lakini kitendo cha kushindwa kuhakikishiwa namba kilimfanya afikirie upya na kuamua kwenda sehemu ambayo atapewa nafasi ya kucheza soka.

Pia alichukua nafasi hiyo kuwashukuru wachezaji, kocha Arsene Wenger na mashabiki waliomuunga mkono na kumpa nafasi katika kipindi chote hicho alichokuwa na timu ya Arsenal.

Taarifa hizo zimepokelewa na mitazamo tofauti na mashabiki wengi wa Arsenal, kuna baadhi wanaunga mkono uamuzi wa kocha kutokumhakikishia namba huku wengine wakisema ya kwamba kocha alitakiwa ampe nafasi.

Kuondoka kwa Wilshere kutaiacha jezi namba 10 wazi hali itakayompa nafasi Mesut Özil kuichukua, kwani kwa kipindi kirefu amekuwa akidai ya kwamba anaitaka.

Hapa chini nimekuwekea walaka huo unaweza kuusoma.

Jack Wilshere

zaidi unaweza kuusoma katika ukurasa wake wa instagram. https://www.instagram.com/p/BkOCXr9B43r/?taken-by=jackwilshere

kila la heri Jack Wilshere

Rasmi Granit Xhaka asaini mkataba mpya

Kiungo wa Arsenal, Granit Xhaka amesajili mkataba mpya ambao utamfanya aendelee kuichezea Arsenal kwa miaka mitano ijayo.

Rasmi Granit Xhaka asaini mkataba mpya

Kiungo huyo mwenye umri wa miaka 25 alikuwa ni mchezaji pekee wa Arsenal kucheza michezo yote 38 ya Arsenal msimu uliopita ambapo aliweka rekodi ya kuwa mchezaji wa kwanza kwa kupiga pasi nyingi ndani ya msimu mmoja katika ligi ya Uingeleza baada ya kupiga pasi 3,116 msimu wa 2017-2018.

Ameishaichezea Arsenal katika michezo 94 na alikuwa katika kikosi cha Arsenal kilichoshinda kombe la FA mwaka jana.

Pia mchezaji huyo ameishaichezea timu yake ya taifa ya Switzerland katika michezo 61 na kwa sasa yupo na timu hiyo wakishiriki katika kombe la dunia nchini Urusi.

Mara baada ya kusainiwa kwa mkataba huyo kocha mkuu wa Arsenal Unai Emery alisema ya kwamba ana furaha kubwa ya kwamba Granit Xhaka ameongeza mkataba wake wa kuichezea Arsenal kwa sababu ni mmoja ya wachezaji muhimu wa timu na pia bado ni kijana mdogo hivyo kuna nafasi ya kuimalika zaidi katika siku za usoni.

Granit Xhaka atavaa jezi namba 34 msimu ujao namba ambayo iliachwa wazi na Coquelin aliyehamia Valencia katika majira ya usajili ya msimu wa baridi.

Je unaonaje habari hizi za Xhaka kusaini mkataba mpya ? tupia maoni yako hapa chini.

 

Ainsley Maitland-Niles asaini mkataba mpya, Apewa jezi namba 15

Ainsley Maitland-Niles amesaini mkataba mpya wa muda mrefu na Arsenal,katika taarifa ramsi iliyotolewa na tofuti rasmi ya Arsenal, mchezaji huyo amekubali kuendelea kuitumikia timu hiyo ya kaskazini mwa London.

Ainsley Maitland-Niles asaini mkataba mpya, Apewa jezi namba 15

Akiwa amejiunga na chuo cha soka cha Arsenal tangu akiwa na miaka 9, mchezaji huyo alikuwa na msimu wa mafanikio makubwa msimu uliopita ambapo alifanikuwa kuwa sehemu ya kikosi cha kwanza.Alifinikiwa kucheza katika michezo 28 katika msimu wa  2017/18 akicheza kama beki mshambuliaji, beki wa kulia na kiungo.

Mwezi wa 12 mwaka 2014, akiwa na miaka 17 na siku 102,Ainsley Maitland-Niles alifanikiwa kuwa mchezaji mdogo wa pili kuichezea Arsenal katika ligi ya mabingwa wa Ulaya, Baada ya kufanikiwa kuichezea Arsenal kwa mara ya kwanza katika mchezo wa ligi ya mabingwa wa Ulaya.

Aliichezea Arsenal katika mchezo wa kwanza wa ligi kuu ya Uingeleza dhidi ya Newcastle siku nne baadaye.

Ikiwa ni sehemu ya maendeleo yake mchezaji huyo alicheza kwa mkopo katika timu ya Ipswich Town katika msimu wa 2015/16, ambapo alicheza michezo 30, akifunga magoli mawili na alichaguliwa kuwa mchezaji bora wa mwezi katika mwezi wake wa kwanza katika timu hiyo.

Akiwa na timu ya watoto ya Uingelea Ainsley, alikuwa nahodha wa timu ya taifa ya vijana wenye umri wa chini ya miaka 20 ambapo alikuwa ni mmoja ya wachezaji muhimu wakati madogo hao walipochukua kombe la dunia mwezi wa 6 mwaka jana.

wakati huo huo mchezaji huyo amebadilisha namba ya jezi ambapo kwa sasa atakuwa anavaa jezi namba 15.

Ainsley Maitland-Niles asaini mkataba mpya, Apewa jezi namba 15

 

Jack Wilshere ataka uhakika wa namba ili abaki Arsenal

Inasemekana ya kwamba kiungo wa Arsenal, Jack Wilshere, ametaka ahakikishiwe nafasi yake kikosini na kocha mkuu wa Arsenal, Unay Emery ili asaini mkataba mpya na kubaki katika timu hiyo.

Jack Wilshere ataka uhakika wa namba ili abaki Arsenal

Katika habari iliyoandikwa na gazeti la Telegraph Mchezaji huyo ambaye mkataba wake unamalizika tarehe 30 ya mwezi huu, bado hajasaini mkataba mpya ingawa kuna taarifa ya kwamba Arsenal wamemuwekea mezani mkataba wa miaka 3 ambapo atakuwa akilipwa paundi laki moja kwa wiki na pia atapewa malipo mengine kwa kila michezo atakayokuwa akicheza.

Lakini kutokana na Arsenal kubadilisha kocha mkuu, Jack ambaye kwa msimu uliopita hakuwa na namba ya kudumu ana mpango wa kukaa chini na Emery ili kujua mipango ya kocha huyo na pia kuhakikishiwa nafasi ya kucheza mara kwa mara.

Jack Wilshere amekuwa mchezaji wa Arsenal tangu akiwa na miaka 9 na amekuwa ni kipenzi cha mashabiki wengi wa Arsenal.Majeraha ya mara kwa mara yamesababisha mchezaji huyo mwenye kipaji cha hali ya juu kushindwa kufikia kilele cha mafanikio, hali iliyomfanya asiwe katika kikosi cha timu ya Taifa ya Uingeleza itakayocheza katika kombe la Dunia nchini Russia.

Je Jack Wilshere ahakikishiwe namba katika kikosi cha kwanza au aondoke na aletwe kiungo mwigine? tupia maoni yako hapa chini.

Mesut Ôzil aumia anaweza kukosa mechi ya ufunguzi kombe la dunia

Mchezaji kiungo wa Arsenal, Mesut Ôzil ameumia na kuna wasiwasi wa kwamba anaweza kukosa mchezo wa kwanza wa kombe la Dunia kati ya Ujerumani na Mexico.

Mesut Ôzil aumia anaweza kukosa mechi ya ufunguzi kombe la dunia

Ujerumani wametangaza ya kwamba kiungo huyo wa Arsenal atakosa mchezo wa kirafiki kati ya Ujerumani na Saudi Arabia ambao unategemewa kufanyika hapo kesho ijumaa, hii inatokana na kuwa na majeraha goti. .

Ozil, mwenye umri wa miaka  29,alipata tatizo hiyo jumamosi iliyopita wakati Ujerumani ilipolala kwa magoli 2-1 dhidi ya Austria, na taarifa tulizonazo ni kwamba kuna uwezekano mkubwa pia akakosa mechi ya ufunguzi wa kombe la dunia kati ya timu yake ya taifa ya Ujerumani na Mexico, mchezo ambao umepangwa kufanyika tarehe 17 ya mwezi huu.

Katika taarifa fupi kupitia ukurasa rasmi wa twitter wa chama cha soka cha Ujerumani, ilidhibitishwa ya kwamba Mesut Ôzil alikosa mazoezi ya Alhamisi na hatacheza mchezo wa kujipima nguvu utakaofanyika ijumaa katika uwanja wa BayArena mjini Leverkusen.

“,Mesut Özil hakufanya mazoezi ya mwisho leo, ila alifanya mazoezi ya kukimbia.Hatacheza mchezo dhidi ya Saudi Arabia, akiwa na majeraha kidogo kwenye goti la kushoto,” chama cha soka cha Ujerumani kilisema kupitia ukurasa wake wa Twitter..

Özil alikosa michezo mingi ya mwisho ya msimu la ligi kuu ya Uingeleza kutokana na kuwa na majeraha ya mgongo wakati wa mchezo kati ya Arsenal na Atletico Madrid kugombea kombe la Europa League tarehe 3 ya mwezi wa tano.

Mabingwa watetezi wa kombe la Dunia wataelekea Russia baada ya mchezo wao wa mwisho wa kirafiki hapo kesho baada ya kocha mkuu wa Ujerumani Joachim Low , kutangaza kikosi chake cha mwisho na kuwaacha wadau wengi wa soka kwa kumuacha mchezaji wa Machester City Leroy Sane.

 

Mechi kati ya wakongwe wa Arsenal na wakongwe wa Real Madrid

Leo kutakuwa na  mchezo kati ya wachezaji wakongwe wa timu ya Arsenal na wachezaji wakongwe wa Real.

Mchezo huo utakaofanyika leo katika uwanja wa Santiago Bernabeu utakuwa ni wa kwanza, kwani mchezo wa marudiano utakuwa tarehe 8 ya mwezi wa tisa mwaka huu.Mechi kati ya wakongwe wa Arsenal na wakongwe wa Real Madrid

Kikosi cha wachezaji wakongwe wa Arsenal

Seaman

Almunia

Campbel

Etame

Cygan

Winterburn

Eboue

Upson

Grimandi

Pires

Parlour

Petit

Silva

Rosicky

Limpar

Reyes

Anelka

Aliadiere

Kanu

Boa Morte

 

Kikosi cha wakongwe Real Madrid

Alfonso

Xabi Alonso

Amavisca

Álvaro Arbeloa

Julio Baptista

Emilio Butragueño

Roberto Carlos

Julio César

Luís Figo

Karembeau

Julio Llorente

Fernando Morientes

Raúl

Ronaldo Nazario

Pavón

Alberto Rivera

Fernando Sanz

Seedorf

Solari

Mchezo huo utaoneshwa moja kwa moja  na arsenal.com

Mchezaji wa zamani wa Arsenal, mkongwe David O’Leary ndiye atakayekuwa kocha wa timu hiyo ya Arsenal kwa siku ya leo.

David O’Leary