Kwa muda sasa nimekuwa nikifikiria kama Arsenal inaweza kufanikiwa kucheza katika ligi ya mabingwa wa Ulaya kwa kushika nafasi nne za mwanzo katika ligi kuu ya Uingeleza.

Nafasi mbili tayari zimeshachukuliwa na timu ya Manchester City na Liverpool, hivyo kuacha vita kali ambapo timu nne ambazo ni Arsenal, Totenham, Chelsea na Manchester United zitakuwa zinawania nafasi mbili zilizobakia.

Totenham

Uwezekano wa Arsenal kumaliza juu ya Totenham ni mdogo sana, ili Arsenal ifanye hivyo itahitaji ishinde michezo yake yote mitano iliyobakia na Totenham ipoteze ama itoe sare mchezo mmoja.

Totenham watacheza na Manchester City jumamosi hii na nikiwa mkweli naamini watafungwa katika mchezo huo, lakini baada ya mchezo huo watabakisha mechi nne, na kati ya hizo tatu watacheza nyumbani na moja ugenini, kwa kiwango cha Totenham ninategemea ya kwamba watashinda mechi zote nne na kutokana na kuwa na pointi 67 sasa hivyo watafikisha pointi 79.

Arsenal yenye pointi 66 itatakiwa ishinde michezo yake yote mitano ili kumaliza juu ya vijana hao wa Pochetino ama itatakiwa washinde michezo minne na kutoa sare mmoja ili wafikishe pointi 79 na kutafuta mshindi kwa tofauti ya magoli ya kufunga na kufungwa.

Yote yanawezekana, lakini kutokana na mwendo mmbaya wa Arsenal katika mechi za ugenini sioni hilo likitokea hivyo naamini Totenham watamaliza katika nafasi ya tatu.

Chelsea

Vijana wa Mauricio Sarri wamekuwa wakicheza vibaya katika mechi za ugenini na wamefungwa na timu zote kubwa walipocheza ugenini, wana mchezo dhidi ya Manchester United ugenini Old trafford jumamosi ya wiki ijayo, pamoja na ubovu wa Manchester United sioni Chelsea wakishinda mchezo huo, ila naamini watashinda michezo mingine mitatu iliyobakia hivyo Chelsea nawatabiria kumaliza na pointi 75 (Manchester United ni wabovu wanaweza kupata sare na kumaliza na pointi 76).

Manchester United

Vijana wa mmasai Ole Sendeka wana kazi ngumu, baada ya jana kupewa kipigo kitakatifu na timu ya Barcelona na kutupwa nje ya kombe la ligi ya mabingwa wa Ulaya kwa jumla ya magoli 4-0, watahamishia nguvu zao zote kujaribu kuingia katika nne bora ili waweze kushiriki michuano hivyo mwakani.

Jumapili ijayo watakuwa na Everton ugenini, Everton hawatabiriki, leo wanacheza vizuri kesho wanaboronga naamini Machester United wanaweza kushinda mchezo huo.

Baada ya mchezo huo watakuwa na mchezo mgumu dhidi ya Manchester City, pamoja na United kuwa nyumbani naamini ya kwamba vijana wa Guardiola ni bora zaidi ya watashinda mchezo huo.

Kama hilo litatokea Manchester United watahitaji kushinda michezo mingine iliyobaki (ukiwemo mchezo dhidi ya Chelsea) na kufikisha pointi 76.

Kwa kuwa United hawana michuano ya ulaya na watawekeza nguvu zao zote kuna uwezekano mkubwa wa kufikisha pointi hizo 76.

Arsenal

Arsenal kwa sasa wapo nafasi ya nne wakiwa wa pointi 66 wakiwa mbele ya Chelsea kwa tofauti ya magoli ya kufunga na kufungwa.

Arsenal ina mechi mbili nyumbani dhidi ya Crystal  Palace and Brighton, ukichukulia ya kwamba Arsenal huwa inacheza vizuri nyumbani nategemea ya kwamba watashinda michezo hiyo na kufikisha pointi 72.

Arsenal imebakisha mechi tatu za ugenini dhidi  ya Wolves, Leicester na Burnley, Wolves ni timu ambayo imekuwa ikizisumbua timu kubwa mwaka huu, naamini watakuwa wamechoka na Arsenal wanaweza kushinda ama kutoka sare katika mchezo huu.

Leicester wamebadilika sana katika wiki za hivi karibuni na utakuwa mtihani mgumu sana kwa Arsenal, kama kuna mchezo ambao Arsenal wangeweza kufungwa huu unaweza kuwa ndio wenyewe.

Mchezo dhidi ya Burnley utakuwa siku ya mwisho wa ligi kuu, kuna uwezekano mkubwa wa kuwa timu hiyo tayari itakuwa imeshajihakikishia nafasi ya kubaki ligi kuu na wachezaji wake watakuwa wapo likizo, kama ningeamua kubeti mchezo wa ugenini ambao Arsenal wangeshinda ningeweka beti yangu katika mchezo huu.

Ikitokea Arsenal ikashinda michezo yake miwili ya nyumbani na kupata pointi nne za ugenini itafikisha pointi 66 sawa na Mancheter United.

Lakini kutokana na kazi nzuri iliyofanya na kocha bora Jose Mourinho, Manchester United wana uwiano mbaya wa magoli ya kufunga na kufungwa na sasa wakicheza chini ya Ole Sendeka hawana uwezo wa kuifunga timu goli nyingi ili kufidia magoli hayo, hivyo naamini Arsenal itamaliza juu ya Machester United kwa tofauti ya magoli ya kufunga na kufungwa.

Arsenal inaweza kufanya maisha rahisi kwa kushinda michezo yote iliyobaki, ingekuwa Arsenal ya miaka ya nyuma ningekuwa na uhakika wa asilimia mia ya kwamba wangefanya hivyo na kumaliza ndani ya nne bora, lakini Arsenal ya miaka ya karibuni ni hadithi tofauti kabisa na lolote linaweza kutokea.

Je Arsenal inaweza kukusanya pointi za kutosha na kuweza kufuzu kucheza ligi ya mabingwa wa Ulaya mwakani ? ni jambo la kusubiri na kuona.

Jana nilikuwa naangalia mchezo kati ya timu ya Ujerumani na Uholanzi ambapo wajerumani walishinda kwa jumla ya goli 3-2.

Katika mchezo huo, mchezaji wa zamani wa Arsenal, Serge Gnabry alifunga alifunga moja ya magoli bora kabisa ya mwezi huu baada ya kumfinya beki wa Uholanzi na kupiga mpira kiufundi na kuiandikia Ujerumani goli la pili.

Kama kawaida ya mashabiki wa Arsenal, baada ya kuingia kwa goli hili kulizuka mabishano huku wengi wao wakiulaumu uongozi wa Arsenal kwa kumuuza mchezaji huyo.

Sitaki kuingia kwa undani sababu za Arsenal kumuuza Sergi Gnabry, au mchezaji yeyote, hapa nataka kuongea suala la mashabiki wa Arsenal na wachezaji vijana, wawe wameondoka ama wamebaki Arsenal.

Wachezaji vijana walioondoka Arsenal.

Mashabiki wa Arsenal wanaokata kuwachoma moto viongozi wa Arsenal baada ya kuwaruhusu wachezaji vijana kuondoka

Haijalishi kama ni Takuna Asano, Gnabry, Oxlade Chamberlain, au Reiss Nelson, haijalishi kama mchezaji ameondoka moja kwa moja ama kwa mkopo, ikitokea mchezaji huyo akafanya vizuri, baadhi ya mashabiki wataanza kuandika kwa nini mchezaji huyo aliruhusiwa kuondoka , kocha ni mjinga, viongozi ni wapumbavu na mambo mengine kama hayo.

Wanatuaminisha ya kwamba wachezaji hao ni bora sana na Arsenal ilifanya makosa kuwaachia iwe kwa mkopo au moja wa moja.

Wachezaji vijana waliobaki Arsenal

Mashabiki wa Arsenal wanaowaunga mkono wachezaji vijana waliopo Arsenal

Mashabiki hao hao wanakuwa wa kwanza kuwatukana na kuwaponda wachezaji wanaochipukia waliopo Arsenal mara wafanyapo makosa hata yawe madogo sana.

Unakumbuka mashabiki waliokua wanamzomea Eddie Nketiah baada ya kufanya vibaya dhidi ya Blackpool na kutaka auzwe?

Kuna mashabiki wengi wa Arsenal wanataka Iwobi auzwe kisa hawezi kupiga pasi ya mwisho, atajifunzaje kama hachezi?

pia kuna mashabiki waliingia kwenye Instagrama ya Ainsley Niles na kumtukana sana kisa alifanya vibaya katika mchezo mmoja.

Ukiangalia kwa makini asilimia kubwa ya wachezaji wanaolia kwa nini Arsenal ilimuacha mchezaji ni hao hao wanaowatukana wachezaji vijana tulionao.

Kama mashabiki hao wangetumia nguvu zao zote kuwapa nguvu wachezaji vijana hasa wanaotoka katika chuo cha soka cha Arsenal cha HALE END, kusingekuwa na haja ya Arsenal kupoteza mamilioni kusajili wachezaji wapya kila mwaka kwani chuo hicho kina wachezaji wengi wenye vipaji vya hali ya juu lakini wengi wao wanashindwa kufikia malengo kutokana na presha kubwa wanayopewa na mashabiki wa soka.

Ni wakati wa kuacha kuwazomea wachezaji wetu hasa vijana na kuwaunga mkono.

Kwanza kabisa ningependa kuwatakia heri ya mwaka mpya kwa mashabiki wote wa Arsenal na wasomaji wetu kwa ujumla.

Leo ikiwa tarehe moja ya mwezi kwa kwanza, ina maana ya kwamba dirisha dogo la usajili limefunguliwa na timu mbali mbali zinaanza kutafuta wachezaji wapya kwa ajili ya kujiimalisha.

Kwa upande wa timu ya Arsenal ni kwamba mashabiki wengi wamekuwa na kiu ya kuona timu yao ikisajili wachezaji katika baadhi ya nafasi kama beki wa kati, beki wa kushoto na winga, ingawa mimi ninaamini ya kwamba Arsenal haitasajili mchezaji yeyote wa maana katika dirisha hili na baadaye kidogo nitakuambia kwa nini.

Jana mwandishi wa BBC, David Ornstein aliandika makala ndefu sana kuhusu sakata la Aaron Ramsey na usajili wa Arsenal na baada ya kuisoma makala ile ninaamini ya kwamba tusitegemee usajili mpya katika dirisha hili.

Ornstein anaanza kwa kusema ya kwamba Aaron Ramsi leo ataanza rasmi mazungumzo na timu za Juventus, Bayern, Inter, PSG, na Real Madrid kuhusu kuhamia moja ya timu hizo mara baada ya mkataba wake kumalizika tarehe 30 ya mwezi wa sita mwaka huu.

Juventus ndio wanaopewa nafasi kubwa ya kumsajili Ramsey kutokana na kwamba mchezaji wao wa kiungo Sami Khedira amekuwa akicheza chini ya kiwango msimu huu na pia umri umeanza kumtupa mkono (anatimiza miaka 32 mwaka huu).

Pia wanaamini ya kwamba uwepo wa Szczesny katika kikosi chao unaweza ukawa kivutio cha Ramsey kuichagua timu hiyo ya Italia.

Aaron Ramsey ni mmoja ya wachezaji wanaowagawanya mashabiki wa Arsenal, kuna wale wanaoamini ya kwamba mchezaji huyo ni mmoja ya wachezaji muhimu kabisa katika kikosi hicho na anastahili kulipwa mshahara mkubwa, huku wengine wakiamini ni mchezaji asiyejielewa uwanjani na bora aondoke, lakini ukiangalia orodha za timu zinazomtaka unaweza kujua upande upi upo sahihi.

Sakata la usajili wa Aaron Ramsey linaonesha ni kwa kiasi gani timu ya Arsenal inavyoendeshwa vibaya.

Katika makala hiyo ambayo ukiisoma kwa makini inaonekana ya kwamba alifanya mahojiano na mmoja ya viongozi wa juu wa Arsenal inaweka wazi ya kwamba Arsenal haitegemea kuuza mchezaji yeyote na pia hawana pesa za kutosha za kununua wachezaji katika dirisha hili la usajili.

Usajili wowote wa kudumu, ada kwa ajili ya mikopo ya wachezaji na mishahara yao itatokana na bajeti ndogo ambayo timu imetenga kuitumia katika kipindi hiki cha usajili, hivyo mategemeo ya kumpata mchezaji mpya ni madogo labda aje kwa mkopo.

Mchezaji ambaye Arsenal wanamuangalia kwa sasa ni kiungo wa Barcelona, Denis Suarez mwenye umri wa miaka 24.

Huo ndio ukweli, usitegemee usajili wowote katika dirisha hili la usajili, Arsenal haikumchagua Unai Emery kama kocha wa Arsenal ili wampatie pesa za kununulia wachezaji.

Yupo kwenye timu ili akuze vipaji vya wachezaji ili badaye wauzwe na kuiingizia timu faida kubwa au kama Ornstein alivyoandika: “Emery atapewa muda wa kufundisha mfumo wake na kukitengeneza kikosi kutokana na muono wake, atapewa madirisha kadhaa ya usajili ili aweze kutimiza nia hiyo kama Liverpoo walivyoendeleza kikosi chao tangu Jurgen Klop alipowasili katika timu hiyo mwezi wa 10 mwaka 2015.”

Kwa hiyo mashabiki wenzangu wa Arsenal kazeni mikanda, anzeni kuzoea.

Ukitaka kusoma kwa undani zaidi makala hiyo utaikuta katika ukurasa wa BBCsports: https://www.bbc.com/sport/football/46722051

Sasa baada ya kuipitia makala hiyo ya BBC nikakumbuka makala nyingine iliyoandikwa na kikundi cha mashabiki wa Arsenal cha  AST (Arsenal Supporter’s Trust) mwishoni mwa mwaka jana ambayo ilikuwa inaelezea hali ya uchumi ndania ya timu ya Arsenal.

kwa wanaopenda kusoma link hii hapa: https://www.arsenaltrust.org/news/2017/arsenals-financial-position-for-201718-assessed

Kwa kifupi jamaa wa AST wanakadiria ya kwamba Arsenal ilipata faida ya paundi milioni 70 katika msimu uliopita (2017/2018 au msimu wa mwisho wa Arsene Wenger).

Hivyo pesa hiyo itaongezea pesa ya akiba ambayo Arsenal inayo ambayo ni paundi milioni 200, lakini ikumbukwe ya kwamba sehemu ya pesa hiyo haiwezi kutumika kwani ni sehemu ya makubaliano ya deni la uwanja, ambalo ni paundi milioni 20.

Hii faida ilitokana na kuuzwa kwa wachezaji, ikumbukwe ya kwamba Arsenal inatumia mfumo uitwao Amortization ( waliosoma uhasimu wanajua namaanisha nini ila kwa wale ambao hawajasomea uhasimu nitajaribu kuelezea), unapouza mchezaji unaandika pesa yote kwenye kitabu chako cha hesabu ya mapato na matumizi lakini unaponunua mchezaji pesa inatoka kwa mafungu ( kwa kiswahili rahisi Arsenal inanunua wachezaji kwa mafungu, mfano Lucas Torreira alinunuliwa kwa paundi milioni 27 lakini hazikulipwa zote, zililipwa paundi milioni 9 wakati wa ununuzi, zitalipwa zingine 9 mwezi wa saba 2019 na tisa za mwisho zinalipwa mwakani 2020, hivyo Arsenal kwenye vitabu vyake ilitoa paundi milioni 9 tu, ndiyo maana ilipata faida).

Pesa ya mauzo ilikuja baada ya kuwauza akina Ox, Giroud na Theo Walcott, hivyo Arsenal isingeuza wachezaji ingeingia hasara ya paundi milioni 44.

Hasar hiyo ilitokana na timu kushindwa kufudhu kucheza katika ligi ya mabingwa ( timu zinashoshiriki makundi hupewa paundi milioni 30) na pia kukosa pesa ya matangazo, wadhamini na mauzo ya tiketi katika michuano hiyo.

Ili kufudia pengo hilo Arsenal ililazimika kuwauza baadhi ya nyota wake. Pamoja na kwamba kuuza wachezaji kunaleta pesa lakini huu sio mfumo bora wa kuunda timu bora na ya ushindani na viongozi wa Arsenal wanalijua hili.

Kitu kingine walichoandika AST ni kwamba Arsenal inategemea kupata hasara ya kati ya paundi £60-70m mwishoni mwa msimu huu, hiyo ni kama Arsenal haitasajili mchezaji yeyote, ikitokea ikafanya usajili hasara inaweza ikawa kubwa zaidi.

Hiyo ndiyo sababu kubwa kwa nini Arsenal haitafanya usajili katika majira haya ya baridi.

Kwani faida iliyopatikana mwaka jana ndiyo iliyotumika kununulia wachezaji katika dirisha la usajili la majira ya kiangazi na pesa hizo zimeisha.

Lakini tutajua zaidi wakati Arsenal itakapotoa ripoti ya mapato na matumizi mwezi wa pili mwaka huu.

Ukisoma ripoti ya BBC utaona ya kwamba Arsenal itaongeza pesa za usajili katika dirisha kubwa la usajili hii ni kwa sababu katika muda huo pesa za udhamini za Adidas zitakuwa zimeingia,pesa za mishahara ya mwachezaji wanaoodoka, na pia pesa za matangazo ya vituo vya luninga na kama Arsenal itafanikiwa kuingia katika ligi ya mabingwa wa Ulaya pesa itaongezeka zaidi.

Hii ni kwa mara ya kwanza ndani ya miaka zaidi ya 20 Arsenal inajiendesha kwa hasara na kama itashindwa kujifufua kiuchumi kuna uwezekano mkubwa wa kwamba tukaona mastaa wakiuzwa na kuletwa makinda ili timu iweze kujiendesha.

Baada ya kusoma hayo nikajiuliza kwa nini Kroenke asitoe pesa mfukoni mwake na kusaidia usajili, baada ya kufanya uchunguzi nikaona ni sababu kuu tatu.

Moja ni kwamba Arsenal ni timu inayojiendesha kwa kutumia mapato yake yenyewe na hicho kimekuwa kivutio kikubwa kwa wadhamini na wawezekaji, akiweka pesa atakua ameondoa kivutio hicho.

Mbili, sheria za ligi kuu ya Uingeleza inazitaka timu za ligi kuu ya Uingeleza zisiongeze zaidi ya paundi milioni 7 katika bajeti yake ya mishahara, zinaweza kuongeza zaidi iwapo zitauza wachezaji ama zitapata faida, Arsenal inajiendesha kwa hasara hivyo hawezi kufanya hivyo.

Tatu,shirikisho la soka la Ulaya linazitaka timu kujiendesha kwa kutumia mapato yao na sio kutegemea pesa kutoka nje, ndiyo maana Machester City na PSG kila mwaka wako kwenye matatizo na shirikisho hilo, sidhani kama Kroenke anaweza kuweka pesa na kuvunja hiyo sheria.

Lengo langu sio kuwakatisha tamaa mashabiki wa Arsenal, au kuwaharibia sherehe zenu za mwaka mpya , lengo langu kuu ni kuwaambia ukweli kwa nini Arsenal haitasajili mchezaji yeyote wa maana katika dirisha hili la usajili, labda awe kinda au mchezaji wa mkopo, ili ikitokea haujafanyika usajili watu wasipaniki na kuanza kutukana kwenye mitandao.

Pia kumbukeni ya kwamba Arsenal inajiendesha kwa hasara kwa mara ya kwanza kwa zaidi ya miaka 20, miezi 6 tu baada ya Arsene Wenger kuondoka, unaamini ni bahati mbaya? Mimi sina jibu, mwaka mpya mwema.

#COYG

Yakiwa yamebaki masaa machache kuuaga mwaka huu 2018 ningependa kuchukua nafasi hii na kusema asante sana kwa wote waliotuunga mkono katika mwaka huu wa 2108 na pia kuwatakia heri na fanaka katika mwaka mpya wa 2019.

Wakati naanzisha blog hii sikutegemea kupata wasomaji wengi kiasi hiki kwani sijawahi kuwa mwandishi wa habari, sijawahi kusomea au kuota kuandika, nikiwa shule nilikuwa natoroka somo la kiswahili.

Lakini pamoja na mapungufu mengi katika taarifa tunazotoa bado wewe kama mdau umeendelea kutuunga mkono na kwa hili tunasema asante.

Mwaka huu mambo hayakwenda kama tulivyopanga kwani mwishoni mwa mwezi wa nne tulipoteza habari zote zilizokuwepo mwanzo na kutokana na majukumu mengine ilichukua kama miezi miwili kuanza kuandika upya, katika kipindi hicho tulikuwa tunapokea ujumbe kutoka kwa wadau mbalimbali waliokuwa wanataka kujua nini kilitokea na walikuwa tayari kutoa msaada.

Kwetu sisi hilo lilikuwa ni jambo lililotutia sana moyo kuona ya kwamba kuna baadhi ya watu wanapenda tunachokifanya na wapo tayari kutusaidia.

Pia kuna wakati tunashindwa kuweka taarifa kila siku kutokana na kuwa na majukumu mengine kikazi ama kifamilia na kwa hilo tungependa kuomba msamaha, ila tunaahidi mwaka 2019 tutajitahidi lisitokee mara kwa mara.

Asilimia 79 ya wasomaji wetu ni watanzania, na kwa hilo tunasema asante Tanzania,pia asante sana kwa wasomaji wetu kutoka nchi nyingine ikiwemo Kenye, Marekani, Congo, Afrika ya kusini, Burundi na nyinginezo.

Kwa upande wa majiji na mikoa, tumepata wasomaji wengi kutoka Dar es salaam wakifuatiwa kwa mbali na Nairobi,Mwanza na Zanzibar, asanteni sana na Mungu awabariki.

Heri ya mwaka mpya 2019 msisahau kumshukuru Mungu kwa mwaka uliopita na kumuomba atuoongoze katika mwaka mpya ambao tunauanza ndani ya dakika chache.

#COYG

Jumamosi iliyopita Arsenal ilianza kushinda tena baada ya kuifunga timu ya Burnley kwa idadi ya magoli 3-1, baada ya kufungwa na Southampton kwenye ligi na Totenham kwenye kombe la Carabao, ilikuwa ni muhimu kwa Arsenal kushinda ili kuendeleza matumaini ya kumaliza ndani ya timu nne za mwanzo katika ligi kuu.

Katika mchezo kuna mambo mengi sana yaliyotokea ila kwangu mimi haya ndiyo mambo matano ambayo niliyaona.

1: Hatimaye Arsenal ilifanikiwa kumaliza kipindi cha kwanza ikiwa inaongoza

Tangu msimu huu uanze, Arsenal ilikuwa haijawahi kwenda mapumziko wakiwa wanaongoza, mara nyingi walikuwa wakienda mapumziko wakiwa nyuma ama wakiwa sare, kwa mara ya kwanza msimu huu tulishuhudia hali hiyo ikibadirika baada ya goli la Pierre Emerick Aubamayang kumaliza mkosi huo.

2: Burnley walibipu, Arsenal walipokea

Nchini Uingeleza kuna imani ya kwamba wachezaji wa Arsenal ni dhaifu, na hali hii imepelekea timu nyingi kwenda Emirates na kuwachezea rafu wachezaji wa Arsenal hivyo kuwafanya washindwe kucheza kwa uhuru na kuishia kupoteza mchezo.

Hali hiyo ilikuwa ikitokea sana kipindi cha nyuma wakati Arsene Wenger alipokuwa kocha wa Arsenal, kwa mtazamo wangu naamini kocha wa Burnley aliwaambia wachezaji wake wacheze kibabe na kwa mara ya kwanza nikaona wachezaji wa Arsenal wakijibu, Sokratis, Xhaka, Torreira na Kolasinac wameongeza kitu kwenye hii timu, kwanituliona jinsi wachezaji wa Arsenal walivyoweza kucheza soka la kutumia nguvu na kuwazidi Burnley hadi kufikia hatua ya kocha wao kupaniki.

3: Kupaniki kwa Sean Dyche

Baada ya mchezo kuisha kocha wa Burnley, Sean Dyche aliwaacha watu wengi hoi jinsi alivyompa mkono kocha wa Arsenal, Unai Emery.

Sean Dyche alionekana ni mwenye hasira na akiwafokea waamuzi mara kwa mara, katika mkutano na waandishi wa habari baada ya mchezo huo alionekana kuwashambulia wachezaji wa Arsenal kwa kukosa uanamichezo na kujiangusha, na alipoulizwa kuhusu uhuni waliokuwa wanafanya wachezaji wake alikosa jibu la maana.

4: Umuhimu wa Granit Xhaka

Kwa sasa Granit Xhaka ni mchezaji muhimu kuliko wote ndani ya kikosi cha Arsenal, katika mchezo wa juzi alianza kama kiungo wa kati na kuifanya Arsenal icheze vizuri, mara baada ya Unai kuamua kucheza na mabeki watatu, Xhaka alicheza kama beki wa kati,pia tumeona Xhaka akicheza kama beki wa kushoto.

kuwa na mchezaji ambaye anaweza kucheza vizuri katika nafasi mbalimbali ni baraka kubwa kwa kocha kwani kocha anaweza kufanya mabadiliko ya kimfumo au kiufundi bila ya kubadilisha wachezaji kama ilivyotokea jumamosi iliyopita na kuisaidia Arsenal kupata ushindi.

5: Mesut Özil

Kocha Unai Emery aliamua kumuacha nje Mesut Özil katika mechi dhidi ya Southampton na Totenham kwa madai ya kwamna ni sababu za kiufundi.

Lakini katika mchezo wa juzi Özil alionesha kwa nini ni mchezaji anayelipwa pesa nyingi kuliko wote ndani ya Arsenal.

Ana uwezo wa kipekee katika kuona pasi ambazo wachezaji wengi hawawezi kuona, ili kudhibitisha hilo angalia ile pasi aliyompigia Kolasinac iliyosababisha goli la kwanza la Arsenal.

Arsenal ni bora lakini wanakuwa bora zaidi Mesut Özil akicheza.

Hayo ndiyo mambo matano niliyoyaona katika ushindi wa Arsenal dhidi ya Burnley, je wewe uliona kipi? tupia maoni yako hapa chini.

Baada ya Arsenal kufungwa na Southampton sikuweza kuingia mtandaoni au kuandika chochote katika ukurasa huu kutokana na kuwa na majukumu mengine.

Jana usiku niliingia katika mitandao ya kijamii na kuona ya kwamba mashabiki wa Arsenal wakianza mchezo wa kumtafuta mchawi kutokana na Arsenal kupoteza mchezo huo.

Kuna wengine wanamnyooshea vidole kocha mkuu, Unai Emery kwa kupanga timu vibaya, wengine wanadai timu ilipoteza kwa kuwa Laurent Koscienly alicheza kama beki wa kati, wengine wanadai Mesut Özil ndiye tatizo, cha msingi ni kwamba asilimia kubwa ya mashabiki wameshapata mtu wa kumtupia lawama.

Huwezi ukamlaumu Unai Emery kwa kupoteza mchezo ule, ni msimu wake wa kwanza Arsenal, baada ya kufungwa michezo miwili ya mwanzo aliiongoza Arsenal kucheza michezo 22 bila ya kufungwa, Mustafi na Sokratis walikuwa wamefungiwa, Kolasinac majeruhi, Bellerin aliumia mapema, na zaidi ya yote Rob Holding ambaye kwa mtazamo wangu ndiye beki wa kati bora wa Arsenal kwa sasa ni majeruhi hadi mwisho wa msimu.

Mwalimu alikuwa na wakati mgumu na alijitahidi kuipanga timu aliyoweza.

Kwa upande wa wachezaji, kama binadamu wanaweza kuwa na siku mbaya, kila mchezaji ana mapungufu yake, lakini hicho sio kigezo cha kuwatukana na kuwazomea.

Nimeona mtu kaposti eti Koscienly auzwe kwa sababu kaisha na kuwa beki mbovu, hiki ndicho nilichomjibu, Koscienly aliumia mguu akiiteteza Arsenal, alikuwa akicheza akiwa na maumivu ya mguu lakini kutokana na Arsenal kutokuwa na mabeki katika mchezo dhidi ya Atletico Madrid,Arsene Wenger alimuomba acheze , akaamua kucheza na bahati mbaya aliumia na kupoteza ndoto yake ya kucheza kombe la dunia.

Emery amekuwa na Arsenal katika dirisha moja tu la usajili, anatakiwa apewe muda ili ajuwe ni mchezaji gani atamuamini na nani atamuacha pia wachezaji wanatakiwa wapewe muda wa kujifunza ni nini mwalimu anataka, haya mambo hayawezi kufanyika katika miezi 6.Jurgen Klop alimaliza nafasi ya nane katika msimu wake wa kwanza, Pep Guardiola hakubeba hata kombe moja katika msimu wake wa kwanza.

Wahenga walisema ya kwamba kuvunjika kwa koleo sio mwisho wa uhunzi na mimi naamini ya kwamba kufungwa na Southampton sio mwisho wa Arsenal na bado naamini itamaliza ndani ya nne bora.

Wito wangu kwa mashabiki wa Arsenal, tulieni kocha Unai Emery anajua anachokifanya, baada ya misimu miwili mtanona matunda yake.

Leo tunacheza dhidi ya Totenham Hotspurs katika robo fainali ya kombe la Carabao, #COYG

Nakumbuka miaka ile ambapo mechi kati ya Arsenal na Manchester United ilikuwa ni mechi ambayo ilitumika kuamua bingwa wa Uingeleza. Kipindi hicho kabla ya Machester City na Chelsea hazijaundwa, kipindi cha Arsene na Ferguson.

Mpaka leo hii ni mechi kubwa kwa timu zote mbili, ingawa sio kubwa kama kipindi kile, Wenger na Ferguson walishaondoka, Arsenal haijachukua kombe kwa miaka 14 sasa na Manchester United wanaelekea mwaka wa 7 bila ndoo.

Timu hizo mbili zinakutana katika hali tofauti, Manchester United wao wakiwa wanaendelea kuporomoka na kushuka kiwango tangu aondoke Fergie, wakati Arsenal wanaonekana kuimalika na kucheza vizuri tangu aondoke Arsene Wenger na kuja Unai Emery.

Mwenendo wa timu

Arsenal inaingia katika mchezo wa leo ikiwa ina mwenendo mzuri , kwani tangu wafungwe mechi mbili za mwanzo hawajafungwa tena, wamecheza mechi 19 bila kufungwa na leo wanaweza kufikisha mechi 20.Waliwafungwa Bournemouth 2-1, Vorskla 3-0 kabla ya kuwashushia kipigo Totenham cha 4-2.

Manchester United wao wana mwenendo usioridhisha sana, kwani katika mechi tatu zilizopita walifungwa na watani wao wa jadi Manchester City 3-1, Waliishinda Young Boys 1-0 kwa mbinde na goli la mkono,walitoa sare ya 2-2 na Southampton na kupelekea kocha wa Southampton kupoteza kibarua chake.

Makocha

Arsenal kwa sasa inafundishwa na Unai Emery ambaye sifa yake kubwa ni kuwasoma wapinzani na kuwapangia kikosi ambacho anaamini kitampa ushindi, na pia ameifanya Arsenal icheze soka la kuvutia na iwe ni timu ambayo haifungwi kirahisi.

Kwa upande wa Man Utd, kocha wao Jose Mourinho, kwanza hana kikosi cha kwanza, amegombana na nusu ya wachezaji na pia msimu huu wamekuwa wakicheza soka lisiloeleweka, tofauti na Mourinho wa zamani ambaye timu zake zilikuwa hazifungwi ovyo, timu hii ya Mourinho huyu imekuwa ikifungwa hovyo kiasi cha kwamba imefungwa magoli mengi kuliko iliyofungwa katika ligi kuu mwaka huu.

Kocha wa Arsenal, Unai Emery hajawahi kumfunga Mourinho katika michezo mitano waliyocheza, Mourinho akiwa na Real Madrid aliifunga Valencia ya Unai mara tatu na kutoka sare mara moja , pia Mourinho kawahi kumfunga Unai akiwa na timu ya Sevilla mara moja.

Lakini nitamtetea Unai hapa kwani Mourinho alikuwa na timu yenye wachezaji wakubwa na wenye vipaji ya Real Madrid wakati Unai alikuwa na timu za kuungaunga za Sevilla na Valencia.

Mashabiki

Kwa mara ya kwanza ndani ya miaka minne nimeona mashabiki wa Arsenal wameungana na kuwa kitu kimoja, niliangalia mchezo dhidi ya Spurs, mashabiki walikuwa nyuma ya timu wakati wote, hata wakati timu ipo nyuma 2-1 wakati wa mapumziko bado waliendelea kushangilia kwa nguvu, ni jambo jema kuona hali ya umoja imerudi ndani ya Arsenal.

Kwa upande wa Machester United mashabiki wao wanaonekana kugawanyika sana, kuna wasiomtaka Jose Mourinho na wengine wanaotaka aendelee, wananikumbusha kipindi cha Wenger In na Wenger Out, ni vigumu sana timu kufany vizuri katika mazingira haya ndiyo maana sishangai timu yao ipo nafasi ya 7.

Majeruhi

Jana Koscienly alicheza katika timu ya vijana na kulazimika kutolewa mapema baada ya kuumia, Nacho Monreal jana alifanya mazoezi na kikosi cha kwanza, Mesut Özil leo anatarajiwa kufanyiwa vipimo kwani bado alikuwa na maumivu ya mgongo,Dinos Mavporanos bado anauguza mguu na Danny Welbeck ni majeruhi wa muda mrefu, hao wachezaji wanategemewa kukosekana leo.

Pia Granit Xhaka hatacheza leo kutokana na kuwa na kadi tano za njano.

Kwa upande wa Manchester United nako kuna majeruhi, Alexis Sancheza ataukosa mchezo huu pamoja na Lindelof, kuhusu wachezaji wengine wanaodhaniwa ya kuwa ni majeruhi katika ukurasa wa MUTV hakuna taarifa rasmi kwani Mourinho alikataa kutoa taarifa za wachezaji.

Vikosi

Kwa upande wa Arsenal ningependa sana kianze kikosi kilichomaliza mchezo dhidi ya Totenham, na pia niliupenda ule mfumo 3-4-1-2, Ramsey akicheza nyuma ya Aubamayang na Lacazette na Matteo Guendouzi akichukua nafasi ya Xhaka kucheza na Torreira pale kati. Wachezaji wengine wote wabaki vile vile.

Kwa upande wa Manchester United, katika mchezo dhidi ya Southampton aliwatumia Matic na Scott kama mabeki wa kati, nipo hapa nafanya maombi awapange tena, sijali wachezaji wengine akiwapanga hao wawili kama mabeki wa kati roho yangu itakuwa na furaha.

Utabiri wa matokeo

Arsenal ina miaka 11 bila ya kushinda Old Traffod katika mchezo wa ligi kuu na mara ya mwisho kushinda katika uwanja huo ilikuwa ni mwezi wa nne mwaka 2015 katika kombe la FA baada ya Danny Welbeck kuizamisha Manchester United iliyokuwa ikifundishwa na Louis Van Gal.

Hata Arsenal iwe nzuri vipi, imekuwa ikipata tabu kuwafunga Manchester United kwao, kwangu mimi naona hili ni tatizo la kisaikologia zaidi kuliko uwezo.

Kwa sasa mambo yamebadilika Arsenal, timu ina mwalimu tofauti na mwenye mbinu tofauti hivyo naamini ya kwamba umefika wakati wa kuuvunja huu mwiko na kuwafunga Manchester United kwao.

Hivyo natabiri ya kwamba Arsenal itashinda mchezo huu kwa jumla ya magoli 3-1, Auba na Lacazette kutupia.

Je wewe una maoni gani kuhusi mchezo huu? tupia maoni yako hapa chini.

Mara baada ya mchezo wa juzi kumalizika mashabiki wengi wa Arsenal walianza kumponda kiungo mshambuliaji wa Arsenal, Henrikh Mhkitaryan.

Iwe kwenye twitter, facebook au WhatsApp asilimia kubwa ya mashabiki hao walionekana kutoridhishwa na kiwango cha mchezaji huyo hadi wengine wakisema biashara kati ya Arsenal na Manchester United ya kubadilishana Sanchez na Mhkitaryan ilikua ndiyo biashara mbovu kabisa kuwahi kutokea duniani.

Je madai hayo yana ukweli ? niliamua kuingia msituni na kufanya uchunguzi wa kina na haya ndiyo majibu niliyoyapata, wengi wao walikosea kwani Mhkitaryan alikuwa ni mmoja wa wachezaji waliofanya kazi kubwa sana katika mchezo huo.

Sintokaa hapa nikuandikie maneno tu, nitakuwekea pia na ushahidi katika mambo matano ambayo aliyafanya vizuri na kuchangia kwa asilimia kubwa katika ushindi huo, twende kazi.

Alianzisha mnyororo wa goli la ushindi

Ukirudi nyuma na kuangalia goli la pili na la ushindi la Arsenal lilivyopatikana utaona ya kwamba mpira ulianzia kwa Henrikh Mhkitaryan (ulikuwa ni mpira uliokufa baada ya Lerma kufanya faulo) yeye alimpasia Xhaka, ambaye alimpatia Iwobi aliyepiga pinpoint pasi iliyomkuta Kolasinac ambaye aliujaza ndani ya 18 na Auba akauzamisha wavumi. angalia picha ya hapo chini utaelewa zaidi.

goli la pili la Arsenal

Alikuwa kila sehemu

Kama ulikuwa hujui ni kwamba mchezo wa juzi dhidi ya Bournemouth ndiyo mcheza ambao Arsenal wamekimbia zaidi msimu huu, katika mchezo huo wachezaji wa Arsenal walikimbia kilometa 121.6, katika mchezo huo wachezaji watatu tu ndiyo waliokimbia daidi ya kilometa 12 ( ni mara chache sana wachezaji kuvusha kilometa 12 ndani ya dakika 90).

Katika mchezo huyo Henrikh Mhkitaryan alikumbia kilometa 12.3 na kushika nafasi ya 2 nyuma ya Hector Bellerin (angalia picha hapo chini), na sio kwamba alikimbia tu pia alikimbia maeneo muhimu (soma pointi inayofuatia)

Aliunganisha vizuri kati ya mabeki wa washambuliaji

Kama nilivyosema awali sio kwamba Henrikh Mhkitaryan alikuwa kila sehemu, pia alifanya kazi kubwa sana katika kiungo.

Kazi ya kuunganisha washambuliaji na mabeki mara nyingi huifanya Granit Xhaka lakini juzi mchezaji aliyeifanya kazi hiyo alikuwa ni Mhki, Hii ilitokana na kocha Emery kuamua kumchezesha chini zaidi kuliko kawaida.

Ukiangalia katika karatasi la timu, yeye anaanza kama kiungo mshambuliaji, lakini ukiangalia jinsi sehemu alizopokelea pasi utaona kabisa ya kwamba anapokea pasi kutoka nyuma zaidi.

Ukiangalia kwa karibu picha ya hapo juu utaona ya kwamba Mhki alipokea pasi 11 kutoka kwa Mustafi (ambaye alicheza kama beki wa kati) na pia alipokea pasi 10 kutoka kwa Torreira (kiungo mkabaji). Tofauti na kiungo mshambukiaji mwingine katika mchezo huo (Alex Iwobi) ambaye alipokea pasi tatu tu kutoka kwa Rob Holding na nne tu kutoka kwa Torreira (angalia picha ya hapo chini).

Pia katika mchezo wa juzi Arsenal walipiga pasi nyingi zaidi ndani ya eneo la hatari la adui (asilimia 33) huku Iwobi na Mhkitaryan wakiongoza katika eneo hilo.

Alicheza vizuri mfumo wa 3-4-3

Antonio Conte na timu yake ya Chelsea ndiyo waliupa umaarufu huu mfumo katika ligi kuu ya Uingeleza mwaka juzi, kama uliwaangalia Chelsea vizuri mwaka ule utagundua ya kwamba alikuwa akiwachezesha Hazad na Wilian au Hazad na Pedro kama viungo washambuliaji, wachezaji wote watatu wana sifa kubwa moja, wanaweza kucheza kama viungo washambuliaji wa kati na pia wana uwezo wa kucheza kama mawinga.

Henrikh Mhkitaryan aliitendea vyema nafasi hiyo kwani hicho ndicho alichokifanya (angalia tena picha ya pasi alizopokea hapo juu), katika Arsenal hii ni wachezaji wawili tu wenye uwezo huo nao ni Alex Iwobi na Mhki na ndiyo maana wote wawili walianza hiyo juzi.

Anaweza soka la kibabe

Katika mchezo wa wiki mbili zilizopita dhidi ya Wolves, mwalimu Emery aliamua kumtoa Mesut Ôzil na kumuingiza Mhki na watu wengi hawakuelewa kwa nini alifanya hivyo.

Sababu kubwa ilikuwa ni kwamba Wolves waliamua kurudi nyuma na kuzuia, walikuwa wakitumia nguvu nyingi na pia walikuwa wakiacha nafasi finyu kati yao.

Ukitaka Ôzil aache kucheza mpira anza kumchezea rafu au kutumia nguvu, Ôzil yeye hutumia akili zaidi ila kuna sehemu na wakati nguvu zinahitajika na Mkhi analiweza hilo.

Juzi pia kocha huyo aliamua kumuacha katika benchi Ôzil na kumuanzisha Mhki na baada ya mchezo aliulizwa sababu kwa nini alimuacha Ôzil benchi, jibu lake lilikuwa nilijua ya kwamba Bournemouth wanatumia nguvu sana wakiwa katika uwanja wao wa nyumbani hivyo nikaamua kutumia wachezaji wengine.

Pamoja na Bournemouth kutumia nguvu lakini bado Mhkitaryan aliweza kucheza vizuri na kuwakimbiza.

Neno la mwisho

Huu ni mtazamo wangu nimejaribu kuweka baadhi ya data ili kudhibisha maoni yangu ya kwamba Henrikh Mhkitaryan alicheza vizuri katika mchezo dhidi ya Bournemouth na alikuwa ni mmoja ya wachezaji waliosaidia sana kupatikana kwa ushindi huo.

Kama wewe unaona tofauti ni sawa, unaweza kutumia nafasi hii kuonesha ya kwamba nimekosea, ukumbi ni wako tupia maoni yako hapo chini.

Wakati ligi ikiwa imesimama kwa wiki mbili ili kupisha mechi za kimataifa nimeona leo bora niongelee kuhusu mwenendo wa Arsenal tangu msimuu huu uanze. Huu ni mtazamo wangu kuhusu msimu wa Arsenal mpaka sasa.

Unai Emery amevuka matarajio yangu

Huu umekuwa msimu tofauti sana  kwa sisi mashabiki wa Arsenal, Arsene Wenger aliondoka mwishoni mwa msimu uliopita na akaletwa kocha mpya Unai Emery.

Bila kujali kama unaamini ya kwamba uwezo wa Wenger ulifikia kikomo ama la, kuchukua mikoba ya kocha aliyeiongoza timu kwa miaka 22 si kazi rahisi, lakini kwangu mimi naona mpaka sasa Unai Emery kafanya kazi nzuri.

Wachezaji walifanya vizuri

Safu ya ushambuliaji ya Arsenal ikiongozwa na Alexandre Lacazette na Pierre-Emerick Aubameyang imefanya vizuri msimu huu, tayari wameshafunga magoli 12 kati yao msimu huu, ambayo yanakaribia kufikia nusu ya magoli yote yaliyofungwa na Arsenal mpaka sasa 26.

Lacazzete ameonekana akiwa hatari zaidi akicheza kama namba 9 hali iliyomfanya kocha Unai Emery kumchezesha Auba kama kiungo mshambuliaji, licha ya hao bado wamefanikiwa kufanya vizuri.

Lucas Torreira amekuwa kama gundi ambayo inaiunganisha timu, kwani tangu aanze kucheza katika kikosi cha kwanza Arsenal bado haijapoteza mchezo hata mmoja, ana uwezo mkubwa wa kuwapokonya maadui mpira na kuanzisha mashambulizi ya haraka.Uwepo wake uwanjani umemfanya Granit Xhaka kucheza vizuri pia.

Alex Iwobi pia anaonekana amebadilika sana msimu huu na kucheza kwa kujiamini sana ingawa bado anatakiwa aongeze bidii hasa katika uzalishaji na ufungaji wa mabao.

Upande wa makinda Emile Smith Rowe na Matteo Guendouzi wamefanya vizuri sana na wamezitumia vizuri nafasi zote walizopata na kuonesha uwezo wao.

Waliocheza chini ya kiwango

Mkongwe Stephan Lichtsteiner aliletwa ili kumsaidia Hector Bellerin, mpaka sasa ameshacheza michezo mitatu katika ligi kuu na kama nikiwa mkweli nimemuona kama ni mchezaji ambaye hawezani na kasi ya ligi kuu ya Uingeleza.

Inawezekana ikawa ni umri au bado hajazoea ligi, sioni kama ataweza kuwa chaguo la kwanza la Arsenal, si ajabu kusikia tetesi za kwamba Arsenal wanatafuta beki mpya wa kulia wa kusaidiana na Bellerin.

Mchezaji mwingine ambaye ameshindwa kunishawishi ni Sokratis Papastathopoulos, mchezaji huyo wa zamani wa Dortumund alitua kwa dau la paundi milioni 16. Nilitegemea ya kwamba yeye ndiye angekuja na kuwa mhimili wa safu ya ulinzi ya Arsenal na mpaka sasa hajafikia matarajio.

Amepoteza namba katika kikosi cha kwanza na sasa Rob Holding na Mustafi ndiyo wanaoanza kama mabeki wa kati.

Mbinu za mchezo

Mwalimu Emery ameendelea kuutumia mfumo aupendao wa 4-2-3-1, pamoja ya kuanza vibaya na mfumo huo matunda yake tumeyaona ambapo Arsenal imecheza michezo 10 ya ligi bila kufungwa, imeshinda mara 7 na kutoa sare mara 3.

Ukiondoa mchezo wa mwisho dhidi ya Wolves uliomalizika kwa sare ya 1-1, safu ya ushambuliaji ya Arsenal imeimalika zaidi kutokana na mfumo huu, sababu kubwa ni kwamba timu inaposhambulia mfumo huu hubadilika na kuwa 4-2-2-2, hivyo kuwafanya wachezaji wa Arsenal kujaza nafasi zinazoachwa wazi na walinzi wa timu pinzani (angalia vizuri goli la kusawazidha dhidi ya Wolves utaona), hali inayowafanya Lacazette na Auba kucheza kama washambuliaji (ndiyo sababu kubwa inayowafanya wafunge magoli mengi).

Ingawa mambo yamekuwa magumu kidogo katika mechi zilizopita ambapo Arsenal ina michezo mitatu ya ligi bila kushinda.

Neno la mwisho

Najua Arsenal imetoka sare nne katika mechi tano zilizopita na kuna baadhi ya mashabiki wa Arsenal wameanza kuingiwa na wasiwasi, kwangu mimi naona timu bado inajengwa na kocha Unai Emery anaonekana kama mtu ayayejua anachofanya naamini timu itaendelea kuimalika.

Kwa nilichokiona mpaka sasa siamini kama Arsenal itakuwa bingwa msimu huu ila nina imani kubwa itashika nafasi ya tatu ama ya nne na kufudhu kwa michuano ya ligi ya mabingwa wa Ulaya kwa msimu ujao.

Na huu ndio mtazamo wangu kuhusu msimu wa Arsenal mpaka sasa.

Je wewe umeionaje timu ya Arsenal mpaka sasa? tupia maoni yako hapa chini.