Arsenal vs Wolves-mambo matano niliyoyaona

Arsenal vs Wolves-mambo matano niliyoyaona

Juzi Arsenal ilicheza na timu ya Wolves na kufanikiwa kutoka sare ya kufungana goli 1-1,katika mchezo huo ambao Arsenal haikucheza vizuri kuna mambo mengi yalitokea na haya timu mambo matano ambayo mimi niliyaona na naamini yalichangia kwa kiasi kikubwa matokeo hao.

Mambo matano niliyoyaona

Bernd Leno alionesha ubora wake

Kila mtu anajua ya kwamba Bernd Leno ni bora linapokuja suala la kucheza mpira kwa miguu, lakini katika mchezo wa juzi alionesha pia ustadi wake katika kuzuia mashuti, kwangu mimi yeye ndiye aliyekuwa mchezaji bora katika mchezo huo, bila ya kudaka vizuri Arsenal ilikuwa inafungwa mchezo ule.

Mesut Ôzil alicheza nafasi tofauti

Kabla ya kuanza kwa mchezo huo, vituo vingi vya luninga vilimuweka mchezaji huyo kama namba 10 katika mfumo wa 4-2-3-1, lakini dakika chache baada ya kuanza mchezo huo nilimuona Mesut akicheza nyuma zaidi kama kiungo wa kati na si kiungo mshambuliaji kwangu mimi mfumo ulikuwa kama 4-2-1-3,naamini kocha alifanya mabadiliko hayo ili kuwadhibiti Wolves wakati wakifanya mashambulizi ya kustukiza, kitu ambacho alifanikiwa ila pia iliifanya timu ya Arsenal ishindwe kutengeneza nafasi za kufunga.

Upande wa kushoto ulivuja

Nimeangalia tena mchezo huo na nimeona ya kwamba mashambulizi mengi ya Wolves yalipitia upande wa kushoto wa Arsenal, Kolasinac ambaye sio mzuri sana kwenye kukaba na Aubamayang alikuwa hamsaidii sana, hivyo mara nyingi Kolasinac alikuwa akikabana na wachezaji wawili wa Wolves na kufanya Arsenal kupokea mashambulizi mengi kutoka upande huo.

Kubadilika kwa mifumo

Suala la kuvuja kwa upande wa kushoto lilionwa na kocha Unai Emery na kutokana na kutokuwa na wachezaji wa kuziba upungufu huo akaamua kubadili mfumo, akamtoa Iwobi na kumuingia Matteo Guendouzi na kubadilisha mfumo kutoka 4-2-3-1 na kwenda 4-3-1-2, Torreira akiwa kati, kushoto akacheza Xhaka na kulia Guendouzi na hali hii ilisaidia kukata mashambulizi upande wa kushoto kwa Arsenal.

Baada ya kuingia kwa Ramsey na Mkhitryan alibadili mfumo tena na sasa kucheza 4-2-2-2, huku wachezaji hao wakicheza kama viungo washambuliaji,kazi yao kubwa ilikuwa ni kucheza kwenye mashimo waliyokuwa wakiacha Wolves ambao walikuwa wakilinda goli lao na wachezaji saba.

Mabadiliko hao yalizaa matunda baada ya Ramsey na Mkhitryan kuungana na kusaidia kupatikana kwa goli la kusawadhisha.

Safu ya Ushambuliaji Ilikuwa butu

Kama kuna siku safu ya ushambuliaji iliiangusha Arsenal, juzi ilikuwa ndiyo hiyo siku, Wolves walikuwa wanakaba hadi kivuri na safu ya ushambuliaji ya Arsenal ilishindwa kabisa kupata nafasi za kufunga.

Kama kumbukumbu zangu hazinidanganyi nafasi kubwa ambayo Arsenal walipata ilikuwa ni ile ambayo Aubamayang aligongesha mwamba.

Katika mchezo huo Arsenal ilitengeneza nafasi za kufunga tano tu ndano ya dakika 90, Wolves walienda Emirates wakiwa na mkakati kabambe wa kuifunga Arsenal na kidogo wafanikiwe.

Neno la mwisho

Najua Arsenal wana mechi tatu za ligi kuu bila kushinda na kuna baadhi ya mashabiki wa Arsenal wameanza kuwa na wasiwasi lakini ikumbukwe pia ya kwamba hii timu bado ndiyo inasukwa na ina michezo 15 bila ya kufungwa. Kwa sasa wachezaji wengi wameshajiunga na timu zao za taifa.

Arsenal vs Wolves-Mtazamo wangu

Leo katika uwanja wa Emerates kutakuwa na mchezo kati ya Arsenal na Wolves, huu ni mchezo unaokuja baada ya Arsenal kutoka sare ya bila kufungana na timu ya Sporting Lisbon Alhamisi iliyopita.

Kwa sasa Arsenal inashika nafasi ya tano kwenye ligi na wapinzani wao wa karibu Chelsea, Liverpool, Totenham na Manchester City wote wana mechi nyepesi hivyo ushindi katika mchezo huu ni muhimu ili kuendelea kuwafukuza wapinzani kwa karibu.

Arsenal vs Wolves-Mtazamo wangu

Taarifa za majeruhi

Danny Welbeck alipata majeraha na anaweza kuwa nje kwa msimu mzima, Nacho Monreal amepona ila sidhani kama atacheza leo.Stephan Lichtsteiner ana matatizo ya msuli na anaweza akakosa mchezo wa leo.Mohamed Elneny, Laurent Koscielny na Dinos Mavropanos bado ni majeruhi.

Kuhusu Wolves

Pamoja na kwamba Wolves ni timu iliyopanda daraja msimu uliopita, si timu ya kubeza, kwani chini ya kocha Nuno Espiritu Santo wamekuwa wakicheza vizuri na kwa kasi.

Timu hiyo ambayo inacheza soka la Kireno (wamiliki na wachezaji wake wengi ni wareno) ni timu ambayo imekuwa ikizisumbua timu kubwa, ikimbukwe ya kwamba waliweza kutoka sare na Manchester City na wiki iliyopita kidogo wawaaibishe Totenham, hivyo Arsenal itabidi icheze kwa umakini mkubwa ili kuweza kushinda mchezo wa leo.

Pamoja na yote hayo Wolves hawana rekodi nzuri katika uwanja wa Emerates kwani hawajashinda katika michezo 15 ambapo wametoa sare mitatu na kufungwa 12, pia Arsenal ina rekodi nzuri linapokuja suala la kucheza na timu ambazo zimetoka kupanda daraja.

Kikosi

Hiki ndicho kikosi ninachotegemea ya kwamba kitaanza katika mchezo wa leo.

kikosi

Utabiri

Wolves ni timu nzuri, ina kocha na wachezaji wazuri lakini naamini ya kwamba baada ya Arsenal kushinda mchezo mmoja tu katika michezo minne, ni wakati wa kurudi kwenye ushindi hivyo naamini ya kwamba Arsenal itashinda 3-1,Auba na Laca kufunga.

Je wewe unatabiri matokeo ya aina gani? tupia maoni yako hapa chini.

Arsenal vs Sporting Lisbon-Mtazamo wangu

Arsenal leo itashuka katika uwanja wa Emirates kupambana na timu ya Sporting Lisbon kutoka Ureno katika muendelezo wa michuano ya kombe la Europa League.

Arsenal vs Sporting Lisbon-Mtazamo wangu

Arsenal ambayo kwa sasa inacheza vizuri na haijafungwa katika mechi 14 ambapo imeshinda 12 na kutoka sare 2, mmoja ya michezo waliyoshinda ni ule dhidi ya timu hiyo uliofanyika wiki mbili zilizopita.

Ushindi katika mchezo wa leo sio tu kwamba utaihakikishia Arsenal nafasi ya kucheza raundi ya mtoano ya michuano hiyo pia utaihakikishia nafasi ya kwanza katika kundi hilo.

Umuhimu wa ushindi wa Leo

Ukiangalia ratiba inayoikabili Arsenal mwanzoni mwa mwezi wa 12 ni muhimu sana kushinda mchezo wa leo, kwani tarehe 29 ya mwezi huu itacheza na Vorska ugenini ambako ni mbali, siku tatu baadaye itacheza na watoto wa Pochetino, Totenham, na siku tatu baada ya hapo itacheza na Manchester United ugenini.

Ndani ya siku 6 itacheza na wapinzani wetu wakubwa kama tunataka kucheza ligi ya mabingwa msimu ujao itakuwa ni muhimi sana kupumzisha wachezaji wote katika mchezo wa tarehe 29 dhidi ya Vorska na kuchezesha watoto, kitu ambacho kinaweza kufanyika iwapo tu Arsenal itakuwa imeshafuzu baada ya kushinda mchezo wa leo.

Taarifa za majeruhi

Nacho Monreal ameshaanza mazoezi na timu ya kwanza ila atakosa mchezo wa leo kwani hayupo tayari kucheza, Koscienly naye bado hayupo tayari kucheza,Elneny bado ni majeruhi na haijulikani ni lini atarudi, wachezaji wengine ukiondoa Dinos Mavporanos wote wapo safi kiafya na wanaweza kucheza katika mchezo wa leo.

Wachezaji vijana

Niliangalia mazoezi ya jana na vijana wawili walifanya mazoezi nao ni Emile Smith Rowe na Eddie Nketiah, kutokana na nilivyoona katika mitandao yao ya kijamii nina imani watakuwemo katika kikosi cha leo mmoja akianza na mwingine atakaa benchi. Willock alicheza jana katika timu ya vijana chini ya umri wa miaka 21 hivyo atakosa mchezo huu.

Kikosi

Hizi ni mechi za Mohamed Elenny lakini kutokana na kuwa majeruhi naamini Niles atachukua nafasi yake akisaidiana na Matteo Guendouzi pale kati.

Nategemea kikosi kitakachoanza kitakuwa cha nguvu akitumia wachezaje wengi wakongwe, hivi ndivyo ninavyoamini kikosi kitakavyokupangwa.

Cech; Lichtsteiner, Mustafi, Sokratis, Kolasinac; Niles, Guendouzi, Ramsey; Smith Rowe, Welbeck, Aubamayang.

Utabiri

Utakuwa ni mchezo mgumu kwani Sporting Lisbon watataka kushinda ili wajiongezee matumaini ya kupita ila naamini Arsenal itashinda kwa goli 3-1.

Hizo ndizo taarifa muhimu na mtazamo wangu kuhusu mchezo wa leo dhidi ya Sporting Lisbon, je wewe unatabiri nini? tupia maoni yako hapa chini.

Tumuongelee Rob Holding

Leo nataka nichukue nafasi hii nimuongelee kwa ufupi Rob Holding na kiwango chake alichokionesha msimuu huu. Pamoja na kwamba amekuwa haongelewi sana na vyombo vya habari, mchezaji huyo wa kiingeleza amefanya mambo mengi makubwa msimu huu.

Tumuongelee Rob Holding

Amekuwa akicheza kwa kiwango kizuri katika mechi nyingi sasa na tangu aanze kucheza katika timu ya kwanza upande wa ulinzi umeonekana kuimalika kwa kiwango cha kuridhisha.

Baada ya mchezo wa Liverpool kila mtu alikuwa anaongelea jinsi Xhaka na Torreira walivyowakimbiza viungo vya Liverpool, goli la Lacazette, jinsi Alex Iwobi alivyomfundisha Trent Anord soka na vitu kama hivyo, lakini ni wachache sana wanaoongelea jinsi Rob Holding alivyomuweka mfukoni mfungaji bora wa mwaka jana Moh Salah.

Angalia alichofanya dhidi ya Liverpool.

Katika tackle 6 alizojaribu 4 alifanikiwa.

Aliwanyang’anya mpira maadui mara 6.

Katika mipira 7 aliyojaribu kuokoa alifanikiwa mara 7.

Katika mipira 3 ya vichwa aliyojaribu alifanikiwa mara 3.

Alizuia pasi isimfikie mlengwa mara 2.

Hakucheza rafu hata moja, 0.

Alipiga pasi 81 na kati ya hizo 74 zilimfikia mlengwa maana yake ni kwamba asilimia 91.4 ya pasi zilifika alipotata zifike.

Ukumbuke ya kwamba alifanya yote hayo akipambana na safu ya ushambuliaji inayosikiwa ya kwamba ndiyo moto zaidi katika ligi kuu ya Uingeleza.

Pia inaonekana ya kwamba kwa sasa ndiye beki wa kati anayetegemewa sana katika timu ya Arsenal, kwani ukiangalia katika mechi dhidi ya Blackpool hakucheza, hii inaonesha imani kubwa aliyonayo kocha Unai Emery kwa mchezaji huyo mwenye umri wa miaka 23 tu.

Kuna kitu kingine ambacho nilikiona katika mchezo huo, wakati Rob Holding akipiga pasi kwa mchezaji mwingine anafanya hivyo kwa kasi tofauti na Mustafi ambaye pia alicheza katika mchezo huo.

Sio kwamba nasema ya kwamba Mustafi alicheza vibaya, binafsi naamini ule ulikuwa ni moja ya micheza ambaye Mustafi amecheza kwa kiwango cha hali ya juu, ila nilikuwa najaribu kuonesha tofauti kati ya mabeki hao wawili.

Hata walipokuwa wakipigiana pasi kati yao utaona mpira ukienda kwa kasi kwa kutoka kwa Holding kwenda kwa Mustafi kuliko unavyotoka kwa Mustafi kwenda kwa Holding.

Kwa wale watu waliocheza mpira wanajua ya kwamba mpira ukija kwa nguvu ni rahisi zaidi kupiga pasi upande wowote ule bila ya kuutuliza, kitu ambacho ni muhimu katika kuanzisha mashambulizi ya kustukiza ama kucheza emeryball.

Pia lilikuwa ni jambo la kufurahisha kuona ya kwamba wachezaji waliokulia katika timu ya Arsenal, Hector Bellerin na Alex Iwobi wakifanya vizuri sana msimu huu chini ya mwalimu Unai Emery.

Hayo ndiyo niliyoyaona kuhusu Rob Holding jumamosi iliyopita na nikaamua leo wacha niyaongelee kidogo, kesho tunacheza na Sporting Lisbon ambapo ushindi utamaanisha ya kwamba Arsenal itafuzu hatua ijayo ya Europa ligi kama kiongozi wa kundi.

Rob Holding you know, he is better than Cannavaro

#COYG

Crystal Palace vs Arsenal-Mtazamo wangu

Baada ya Arsenal kuifunga timu ya Sporting Lisbon katika michuano ya Europa League, leo inachezaitajaribu kuendeleza wimbi la ushindi dhidi ya timu ya Crystal Palace katika muendelezo wa ligi kuu ya Uingeleza.

Crystal Palace vs Arsenal-Mtazamo wangu

Majeruhi

Taarifa pekee nilizopata ni kwamba Petr Cech ameshapona na yupo tayari kuanza, na niliona mahojiano ya kocha Unai Emery na kituo cha Sky Sports ambapo alikuwa anasema ya kwamba inabidi afanye maamuzi magumu ya kuchagua kati ya makipa hao wawili nani aanze kwani wote wamefnya vizuri hadi sasa.

Upande wa kushoto bado kuna tatizo na ni mategemeo yangu kwamba kutakuwa ba beki wa kushoto leo na kama hawatakuwa fiti kucheza naamini ya kwamba Stephan Lichtsteiner ataanza upande huo.

Habari njema kwa mabeki wa Arsenal ni kwamba Christian Benteke hawezi kucheza katika mchezo wa leo kutokana na kuwa majeruhi, ingawa bado Crystal Palace wana safu nzuri ya ushambuliaji ikiongozwa na Wilfred Zaha.

Kikosi

Rob Holding amecheza mechi nyingi anaweza akapumzishwa na Granit Xhaka akarudi katika nafasi yake ya kiungo wa kati baada kucheza kama beki wa kushoto katika mchezo uliopita.

Wachezaji wengine natagemea walewale ambao walicheza dhidi ya Leicester City jumatatu iliyopita.

Crystal Palace vs Arsenal-Mtazamo wangu

Utabiri

Huu ni mchezo mgumu lakini Palace kwa sasa hawachezi vizuri sana na pia hawana rekodi nzuri dhidi ya Arsenal, naamini Arsenal itapata ushindi wake wa 12.

Crystal Palace 0-2 Arsenal , Lacazette kufunga goli la kwanza

 

Fulham Vs Arsenal-mtazamo wangu

Leo mida ya saa nane mchana Arsenal itakuwa ikipambana na timu ya Fulham katika uwanja wa Craven Cottage katika ligi kuu ya Uingeleza.

Arsenal ambao hawajapoteza mchoze wowote tangu wafungwe na Chelsea mwezi wa nane leo watakuwa na nafasi ya kuendeleza wimbi la ushindi.

Arsenal ambao walisafiri kwenda Azerbaijan na kufanikiwa kuifunga timu ya Qarabaq kwa jumla ya magoli 3-0 inaweza kukabiliwa na tatizo la uchovu wa safari.

Lakini kocha mkuu wa Arsenal juzi alisema ya kwamba hilo halitakuwa tatizo kwani wachezaji wake wapo fiti na wamejiandaa vya kutosha ili kuwafunga Fulham.

Majeruhi

Hakuna majeruhi wapya katika kikosi cha Arsenal, Aubamayang aliyekuwa anaumwa amepona na jana alifanya mazoezi, Mkhitaryan ambaye hakusafiri kuelekea Baku kutokana na matatizo ya kisiasa yupo tayari kucheza, ingawa Aaron Ramsey anaweza kukosa mchezo huo kutokana na mkewe kuwa karibu na kujifungua watoto mapacha.

Mfumo

Kocha wa Arsenal Unai Emery, alitumia mfumo wa 3-4-2-1 katika mchezo dhidi ya Qarabaq, lakini naamini leo atarudi kwenye mfumo anaoutumia kwenye ligi kuu ambao ni 4-2-3-1.

Kikosi

Kutokana na Petr Cech kuwa majeruhi, Bernd Leno ataanza golini.

Binafsi ningependa Sokratis aanze na Rob Holding kama mabeki wa kati ila kuna kitu kinaniambia ya kwamba Emery atampumzisha Holding na nafasi yake kuchukuliwa na Mustafi. Beki wa kulia Bellerin na beki wa kushoto Nacho Monreal.

Viungo wa kati Lucas Torreira na Granit Xhaka kuongoza safu ya kiungo huku Mkhitaryan akicheza kama winga wa kulia, Mesut Ôzil kama kiungo mshambuliaji wa kati, Auba kama Winga wa kushoto huku Lacazette akianza kama mshambuliaji wa kati.

Fulham Vs Arsenal-mtazamo wangu

                                   

Utabiri

Najua Arsenal wana uchovu wa safari na Fulham wana wachezaji wazuri hasa sehemu ya kiungo ila naamini vijana wapo tayari na leo Arsenal anashinda 2-1.

#COYG

Arsenal vs Watford-Huu ni mchezo muhimu sana

Arsenal leo inacheza na Watford katika mchezo wa ligi kuu ya Uingeleza.Arsenal ambayo kwa sasa inafanya vizuri inategemewa kushinda mchezo huo na kuendelea kupaa katika mshimamo wa ligi.

Arsenal vs Watford-Huu ni mchezo muhimu sana

Watford wanashika nafasi ya nne katika ligi kuu ya Uingelea baada ya kushinda michezo minne na kutoa sare katika mchezo mmoja msimu huu. Mchezo pekee waliopoteza ulikuwa ni ule waliocheza na Manchester United na pia ikumbukwe ya kwamba hii timu ilimfunga Totenham, hivyo Arsenal wanatakiwa kucheza kwa tahadhari kubwa.

Pia naamini huu ni mchezo mgumu zaidi ukilinganisha na timu nyingine 6 ambazo Arsenal hivyo ushindi katika mchezo wa leo sio tu utaifanya Arsenal iwe jii ya Watford, pia utasaidia kujenga hali ya kujiamini zaidi kwa wachezaji.

Pia ikumbukwe pia ya kwamba mwaka jana baada ya Arsenal kufungwa na Watford, nahodha wao Troy Deeney alisema ya kwamba timu ya Arsenal imekosa ”COJONES”, hivyo ni muhimu mno kwa wachezaji kujituma na kushinda mchezo huu ili wamuoneshe Deneey ya kwamba wana COJONES.

(kwa wale wasiojua COJONES ni neno la kiispania linalomaanisha PUMBU kwa kiswahili).

Taarifa ya majeruhi

.Sokratis Papastathopoulos amepita vipimo vya afya na anategemewa kucheza leo, kuna taarifa ya kwamba Emile Smith Rowe ana majeraha ambayo aliyapata katika mchezo wa Carabao Cup.

Kolasinac tayari yupo fiti,Jenkinso ameshaanza mazoezi,Dinos Mavropanos,Niles na Koscienly bado ni majeruhi na hawatahusika kabisa na mchezo huo, wachezaji waliobaki wote wapo fiti.

Kikosi kitakachoanza

Kwa kuwa  Sokratis Papastathopoulos yupo fiti, sitegemei mabadiliko kwenye kikosi kilichomfunga Everton wiki iliyopita.

Mtazamo wangu

Nategemea ya kwamba mabeki wa Arsenal watakuwa na vita kali ya kuwazuia Deeney na Gray ambao wana wanasifika kwa kutumia nguvu nyingi na kucheza rafu za mara kwa mara.Janmaat ataukosa mchezo huo kutoka na kuwa majeruhi, hivyo itawafanya wapangue kikosi chao kwa mara ya kwanza msimu huu na jambo hilo linaweza kuwasaidia Arsenal.

Iwapo Arsenal wataanza kwa kasi na kuepusha makosa ya kijinga naamini kabisha ya kwamba Arsenal itapata ushini wa saba na kuingia katika nne bora kwa mara ya kwanza msimu huu.

Utabiri

Naamini ya kwamba Arsenal ina kikosi bora na chenye uwezo wa kuifunga Watford, bado sina imani sana na safu ya ulinzi, ila naamini leo ushindi ni kwa Arsenal.

Utabiri wangu ni kwamba Arsenal watashinda mchezo huu kwa 3-1. Auba na Lacazette kutupia.

Je wewe mtazamo wako ni upi na unatabiri matokeo ya aina gani? tupia mawazo yako hapa chini.

Arsenal vs Brentford-mtazamo wangu

Ndani ya muda mchache ujao timu ya Arsenal itacheza na timu ya Brentford katika mchezo wa kuwania kombe la Carabao, zifuatazo ni baadhi ya dondoo na mtazamo wangu kuhusu mchezo huu.

Brentford ina rekodi nzuri inapokutana na Arsenal

Kwa wale waliokuwa hawajui huu utakuwa ni mchezo wa kwanza Arsenal kucheza nyumbani katika michuano rasmi dhidi ya Brentford tangu mwaka 1947.

La ajabu zaidi ni kwamba timu hiyo ya daraja la kwanza ina rekodi bora linapokuja suala la michezo baina ya timu hizo mbili, timu hizo zimecheza mara 12,Brentford ameshinda mara 5, Arsenal ameshinda mara 4 na mara 3 wametoa sare.

Pia ikumbukwe ya kwamba mwaka huu kuna tetesi ya kwamba timu hizo zilicheza mchezo wa kirafiki kwa siri na Arsenal kufunga 2-1, ambapo inadaiwa ya kwamba Bernt Leno alifanya makosa yaliyosababisha magoli hayo na ndiyo sababu za kutokuwa kwenye kikosi cha kwanza.

Brentford siyo timu ya kuibeza Unai Emery anatakiwa apange kikosi kizuri na wachezaji wacheze kwa kujituma ili kuondoa aibu.

Pamoja na kwamba timu hiyo ya daraja la kwanza wana rekodi nzuri dhidi ya Arsenal, naamini kikosi cha Arsenal ni kipana na kina uwezo wa kupata ushindi bila ya matatizo makubwa.

Kwa upande wa kikosi kitakachocheza leo nategemea kuona kikosi kile kile kilichoanza katika mchezo wa Europa League kikiwa na mabadiliko mawili tu.

Eddie Nketiah akichukua nafasi ya Pierre Emerick Aubamayang na kinda mwingine Emile Smith Rowe akichukua nafasi ya Henrik Mkhitaryan.

Hiki ndicho kikosi ninachoamini kinaweza kuanza leo na kuleta ushindi.

Arsenal vs Brentford-mtazamo wangu

Utabiri Arsenal 3-0 Brentford, Nketia na Iwobi kufunga

Arsenal Vs Everton-Mambo matano niliyoyaona

Juzi jumapili Arsenal ilipata ushindi wake wa tano chini ya kocha Unai Emery baada ya kuifunga timu ya Everton kwa magoli 2-0.

Katika mchezo huo kuna mambo mengi sana yaliyotokea ila haya mabo matano ndiyo yaliyovuta fikra zangu zaidi.

Petr Cech bado kipa bora

Kuna baadhi ya mashabiki wa Arsenal wamekuwa wakipinga uamuzi wa kocha Unai Emery wa kumuanzisha Petr Cech.

Lakini baada ya kumuangalia Bernd Leno kwenye Europa League na kumuangalia Petr Cech kwenye mechi za msimu huu , naamini kwa sasa Cech ndiye anayeshahili kuwa kipa namba moja.

Leno ni mzuri kwa kucheza mpira kwa miguu lakini Cech ni bora kuliko Leno linapokuja kwenye suala la kuzuia michomo na hicho ndicho mashabiki tunachokitaka.

Na kama kuna siku ambayo angeweza kuwafunga midomo mashabiki wote wanaombeza ni juzi ambapo alicheza kwa kiwango cha hali ya juu.

Aliweza kuokoa magoli ya wazi kutoka kwa washambuliaji wa Everton na pia alikuwa akifanya maamuzi sahihi linapokuja suala la kucheza krosi. Kwangu mimi juzi Petr Cech ndiye aliyekuwa mchezaji bora wa mchezo.

Lucas Toreira anamfanya Granit Xhaka kuonesha ubora wake

Kwa mara ya kwanza Lucas Torreira alianza katika ligi kuu ya Uingeleza baada ya Matteo Guendouzi kupumzishwa.

Kama alivyofanya katika michezo ya nyuma ambayo alianza kama mchezaji wa akiba, mchezaji huyo alikichangamsha kiungo cha Arsenal na kuifanya timu icheze vizuri.

Cha msingi nilichokiona ni kwamba uwepo wa Torreira ulimpunguzia majukumu Xhaka na kumfanya acheze mpira kwa utulivu mkubwa huku majukumu ya kukaba akiachiwa Torreira na majukumu ya kuanzisha mashambulizi akiachiwa Xhaka.

Pamoja na kupata kadi ya njano mapema katika mchezo huo, Torreira alionesha ukomavu mkubwa na kuweza kuwapokonya mipira maadui bila kuwafanyia faulo.

Binafsi sina matatizo na Matteo Guendouzi ila naamini Torreira na Xhaka wanapaswa kuanza pamoja.

Uelewano kati ya Aaron Ramsey na Mesut Özil

Wakati mchezo ukianza Mesut Özil alianza kama winga wa kulia na Aaron Ramsey alianza kama kiungo mshambuliaji namba 10.

Lakini ukiangalia mchezo huo kwa makini walikuwa wakibadilishana kucheza winga wa kushoto ili kumsaidia Pierre-Emerick Aubameyang, ambaye alianza mchezo huo kama winga wa kushoto.

Ukiangalia goli la kwanza la Arsenal Aubamayang anacheza kama mshambuliaji wa kati, Lacazette kama namba 10, na Ramsey kama winga wa kushoto.

Kubadilishana namba huko kuliisaidia Arsenal kutawala kipindi cha pili na huku Ramsey akipata asisti mbili katika mchezo huo. Hali hii pia niliiona katika kipindi cha pili dhidi ya Newcastle.

Kwa mtazamo wangu mimi uelewano bado haujawa mkubwa ila kuna kitu Unai Emery anakifanya na muda si mrefu tutaona matunda yake.

Rob Holding alicheza vizuri

Baada ya kuumia kwa Sokratis mashabiki wengi wa Arsenal walikuwa na wasiwasi kama Arsenal ingeweza kuhimili vishindo vya washambuliaji wa Everton waliokuwa wanalisakama lango la Arsenal mara kwa mara.

Lakini Rob Holding aliweza kuwatuliza mashabiki hao baada ya kucheza kwa utulivu na umakini wa hali ya juu.

Bado Unai Emery anaendelea kuijenga timu

Arsenal Vs Everton-Mambo matano niliyoyaona

Cha msingi ni kukumbuka ya kwamba kila kocha ana falsafa zake na itachukua muda kwa wachezaji hawa kuelewa ni nini hasa mwalimu anataka, kwa sisi tunaoifuatilia Arsenal kwa karibu tumeanza kuona mabadiliko chanya katika uchezaji wa timu, ufanyaji wa mabadiliko na upangaji wa timu, cha msingi tumpe muda kocha Emery.

Hayo ni mambo niliyoyaona katika mchezo kati ya Arsenal na Everton, je wewe uliona nini ? tupia maoni yako hapa chini.

 

Cardiff Vs Arsenal-Mtazamo wangu

Leo mchana Arsenal itakuwa nchini Wales kucheza na timu ya Cardiff katika raundi ya nne ya ligu kuu ya Uingeleza.

Arsenal ambayo ilianza ligi vibaya baada ya kufungwa na Manchester City na Chelsea, wiki iliyopita ilipata ushindi wake wa kwanza chini ya kocha Unai Emery baada ya kuifunga timu ya West Ham kwa jumla ya magoli 3-1.

Mchezo wa leo una umuhimu mkubwa sana, Arsenal inabidi icheze kufa na kupona ili kupata pointi tatu muhimu kwani ikishindwa kufanya hivyo itakuwa inazidi kuachwa na timu nyingine kubwa ambazo zote zilipata ushindi.

Kuelekea katika mchezo huo nitaangalia mambo muhimu ya kuzingatia na pia nitatoa mtazamo wangu kuhusu kikosi kitakachoanza na pia utabiri wa matokeo.

Arsenal haifanyi vizuri ugenini

Tangu mwaka huu uanze Arsenal imekuwa ikifany vibaya sana ugenini, kama sikosei mwaka 2018 Arsenal imeshinda mchezo mmoja tu (mchezo wa mwisho wa ligi msimu uliopita).

Katika msimu huu Arsenal imeshacheza mchezo mmoja wa ugenini na kufungwa 3-2 na Chelsea , kocha Unai Emery anatakiwa kuwapanga vizuri vijana wake ili kuondokana na rekodi hii mbaya na kushinda mchezo huu.

Cardiff hawafungi

Pamoja na Arsenal kuwa na rekodi mbaya ugenini, kitu kinachonipa matumaini leo ni kwamba Cardiff hawajafunga goli lolote tangu mwezi wa nne mwaka huu na tagu msimu huu uanze hawana goli hata moja (ingawa wana uwiano wa magoli ya kufungwa na kufunga bora kuliko Manchester United).

Wamekuwa wakifungwa ama kupata sare za 0-0, naamini mchezo wa leo watapaki basi na kutegemea kufanya mashambulizi ya kustukiza.

Lucas Torreira

Kwa mashabiki wengi wa Arsenal, Lucas Torreira ni usajili bora wa timu katika dirisha lililopita la usajili, lakini mpaka sasaa bado hajaanza mchezo hata mmoja, hii ni kutokana na kwamba kocha anataka aizoee ligi kwanza kabla hajamuanzisha.

Lakini baada ya kusikiliza mahojiano kati ya kocha Unai Emery na waandishi wa habari ambapo Emery alisema ya kwamba mchezaji huyo yupo tayari kuanza.

Ukiangalia vizuri mchezo dhidi ya West Ham, Arsenal ilianza kucheza soka la kueleweka mara baada ya kuingia kwake na Xhaka kupanda juu kidogo.

Naamini Torreira leo ataanza kama kiungo mkabaji akicheza nyuma ya Xhaka na Ramsey huku dogo Guenduzi akianzia benchi.

Mesut Ôzil

Wiki iliyopita fundi Ôzil hakucheza kwa kile kilichodaiwa ya kwamba alikuwa aumwa na baadaye kukawa na tetesi za kwamba alikuwa amegombana na kocha Unai Emery na baadaye ikagundulika ya kwamba ni kweli alikuwa anaumwa.

Lakini kutoka jumanne ya wiki hii Ôzil ameanza mazoezi ya jana alituma ujumbe kupitia mitandao ya kijamii ya kwamba yupo tayari kwa mchezo wa leo.

Katika mahojiano ya waandishi wa habari,Unai Emery alisema ya kwamba anataka Ôzil awe anacheza nafasi mbili, moja kama namba 10 na nyinigine kama winga wa kulia namba 7, kulingana na mchezo na adui.

Leo naamini Emery atamtumia Ôzil kama winga wa kulia na kumhamisha Mkhitaryan winga wa kushoto huku Iwobi akianzia benchi.

Kikosi

Kama nilivyosema leo natagemea mabadiliko mawili tu kulinganisha na kikosi kilichoanza dhidi ya West Ham hivyo kikosi ninachotegemea kitaanza leo ni kama kinavyoonekana kwenye picha hapo chini.

Cardiff Vs Arsenal-Mtazamo wangu

Utabiri wa matokeo

Najua ya kwamba Cardiff watapaki basi na watajaribu kucheza faulo nyingi ili kuipunguza nguvu Arsena, lakini naamini ubora wa kikosi cha Arsenal ni wa hali ya juu na watashinda mchezo huo bila shida ingawa siwaamini sana mabeki wa Arsenal hivyo nitasema 4-1, Auba, Lacazette na Ôzil kufunga.

Je wewe unatabiri vipi tupia maoni yako hapa chini ukiweka kikosi chako na matokeo unayoamini timu itapata.

#COYG

In Unai We Trust-Walete Manchester City

Ligi kuu ya Uingeleza ilianza ijumaa iliyopita na kwa upande wa Arsenal, Ligi hiyo inaanza leo ambapo jeshi la Arseanl chini ya kocha mkuu Unai Emery litawakabili mabingwa watetezi Manchester City.

Baada ya kufanya usajili wa wachezaji watano wapya na kuiandaa timu kwa wiki 6 na baada ya kucheza mechi za kirafiki na kufanya vizuri, umefika wakati wa ukweli, wakati ambapo kila mchezo usahesabika na utaamua nafasi ya Arsenal mwisho mwa msimu.

Ukizingatia umuhimu wa mchezo wa leo, Ninakuletea kiundani mambo muhimu unayotakiwa uyajue kuelekea katika mchezo huo na mwisho nitatoa utabiri wangu.

Historia

Najua unaweza usiamini hili, ila linapokuja pambano baina ya timu hizi mbili Arsenal anaibuka mbabe, kwa taarifa yako katika ligi kuu ya Uingeleza,Manchester City alimfunga Arsenal kwa mara ya kwanza mwaka 2006, baada ya kupokea vipigo 15 na sare 3 tu katika michezo 18 kabla ya hapo.

Pia Arsenal inaongoza katika magoli ya kufunga na pia michezo ambayo imecheza bila kuruhusu goli.Machester City walianza kubadilisha hali ya hewa baada ya kununuliwa na matajiri wa kiarabu ambapo timu hiyo imefungwa mara mbili tu katika michezo 12 iliyopita na ushindi wa mwisho wa Arsenal ulikuwa mwaka 2015.

Pamoja na utajiri wao wote, Ushindi wa Manchester City msimu uliopita katika uwanja wa Emirates ulikuwa wa kwanza tangu mwaka 2012.

Makocha

Kupambana na Guardiola sio kitu kigeni kwa kocha mpya wa Arsenal-Emery amekutana na timu zinazofundishwa na Pep mara 10.

Katika mara hizo 10, Pep kashinda michezo 6 na minne ilimalizika kwa sare,kwa kifupi ni kwamba Emery hajawahi kuifunga timu inayofundishwa na Pep Guardiola.

Lakini kumbuka ya kwamba mapambano hayo yalikuwa ni kati ya Valencia na Barcelona, ni makocha wachache sana waliweza kuisimamisha Barcelona ile ambayo kwa mtazamo wa wengi ni bora kabisa kuwahi kutokea.

Mchezo wa mwisho kati ya makocha hao ilikuwa ni mwaka 2012, baada ya hapo Emery ameenda kushinda makombe nane akiwa na timu za Sevilla na PSG.

Emery anapendelea mfumo wa  4-2-3-1 ambao alipata nao mafanikio makubwa akiwa Sevilla na Pep anatumia mfumo wa 4-3-3 anaoutumia tangu akiwa na Barcelona.

Mwamuzi-Michael Oliver

Mwamuzi katika mpambano huo si mwingine bali ni Michael Oliver,Refa huyo anasifika kwa wepesi wa kutoa penati ,hilo linaweza kuwa tatizo kubwa kwa Arsenal kwani kama Sokratis au Stephan Lichtsteiner iwapo wataanza kwani wana sifa ya kutumia nguvu kukaba.

Lakini Arsenal wanaweza kutumia hilo kwa faida yao kwani kwa kutumia mashambulizi ya kushtukiza wanaweza kuwakuta mabeki wa City bila kujipanga na kuwalazimisha kucheza faulo na kupata kadi.

 

Habari za timu 

Laurent Koscienly na Kolasinac watakosa mchezo huo kutokana na kuwa majeruhi, Danny Welbeck, Nacho Monreal,Aaron Ramsey walikuwa hawana uhakika wa kucheza mchezo huu kutokana na kutokuwa fiti kutokana na majeraha au kushiriki kombe la dunia.

Kikosi

Ukweli ni kwamba hakuna anayejua mchezaji gani ataanza na nani ataanzia benchi, itagememea na mfumo atakaochagua kuanza nao na pia utayari wa wachezaji waliopo, ninaimani ya kwamba ataenda na mfumo wa 4-2-3-1 na kikosi kitakuwa kama ifuatavyo.

In Unai We Trust-Walete Manchester City

Utabiri

Najua Manchester City ni timu nzuri na walifikisha pointi 100 msimu uliopita na najua kila mchambuzi wa soka anaipa Machester City ushindi, na pia najua Unai hajapata muda wa kutosha kuiandaa timu, lakini nina imani leo hii Arsenal inashinda.In Unai We Trust.

Utabiri wangu Arsenal 2-1 Manchester City,Auba kutupia

COYG